شہباز گل نے قانون توڑا، تفتیش ہونی چاہئے، تشدد نہیں۔شاہد خاقان عباسی

اسلام آباد: مسلم لیگ (ن) کے سینئر مرکزی رہنما و سابق وزیر اعظم شاہد خاقان عباسی نے کہا ہے کہ شہباز گِل نے قانون توڑا ہے جس کی تفتیش ہونی چاہئے تاہم تشدد نہیں ہونا چاہئے جس کی قانون میں کوئی گنجائش نہیں۔

تفصیلات کے مطابق اپنے ایک بیان میں ن لیگی رہنما شاہد خاقان عباسی نے کہا کہ عمران خان نے خود تسلیم کیا کہ وہ سلیکٹیڈ تھے، کل کہیں گے کہ میں غلطی سے حکومت میں آگیا، مجھے پتہ ہی نہیں تھا کیونکہ 2018 میں ان کو اسٹیبلشمنٹ لائی تھی۔

یہ بھی پڑھیں:

متحدہ کی اتحادیوں کو حکومت چھوڑنے کی دھمکی

بیان میں شاہد خاقان عباسی نے وزیر اعظم اور وزیرِ داخلہ سے شہباز گل کے معاملے پر نوٹس لینے کی اپیل کرتے ہوئے کہا کہ ہمارے ساتھ جو ہوا تھا، ہم نے تو برداشت کر لیا۔ ملک کے مسائل سے آنکھیں نہیں پھیر سکتے، ہم نے ذمہ داری لی ہے۔

مسلم لیگ (ن) کے تاحیات قائد کے متعلق شاہد خاقان عباسی نے کہا کہ نواز شریف کو پیٹرول کی قیمت میں اضافہ پسند نہیں آیا، اندرونی اختلاف کی بات درست نہیں۔ پیٹرول پر سبسڈی کی گنجائش بھی نہیں تھی۔ 

خیال رہے کہ اس سے قبل شہباز گل کو سخت سکیورٹی میں عدالت پہنچایا گیا جبکہ سابق معاونِ خصوصی کو پنجاب سے اسلام آباد پولیس کی کسٹڈی میں دے دیا گیا ہے۔