وزیر خارجہ شاہ محمود قریشی افغانستان کے ایک روزہ دورے پر کابل پہنچ گئے

کابل: پاکستان اور افغانستان کے مابین دوطرفہ تجارت، اقتصادی و عوامی سطح پر تعاون کے فروغ  کیلئے وزیر خارجہ مخدوم شاہ محمود قریشی وفد کے ہمراہ افغانستان کے ایک روزہ دورے پر کابل پہنچ گئے۔

کابل ہوائی اڈے پر افغانستان کے عبوری وزیر خارجہ امیر خان متقی، افغانستان میں تعینات پاکستانی سفیر منصور احمد خان اور افغان وزارت خارجہ کے سینئر حکام نے وزیر خارجہ کا خیر مقدم کیا۔

وزیر اعظم کے نمائندہ خصوصی برائے افغانستان محمد صادق ،سیکریٹری خارجہ سہیل محمود ،سیکریٹری کامرس صالح احمد فاروقی ،چیئرمین پی آئی اے ائیر مارشل (ر) ارشد ملک ،چیئرمین نادرا طارق ملک ،کسٹم ،ایف بی آر اور وزارت خارجہ کے سینئر افسران بھی وزیر خارجہ کے ہمراہ ہیں ۔

وزیر خارجہ کے اس دورہ کا مقصد معاشی بحران سے نمٹنے کیلئے افغان عوام کی حمایت ، پاکستان اور افغانستان کے مابین دوطرفہ تجارت، اقتصادی و عوامی سطح پر تعاون کو بڑھانا ہے،وزیر خارجہ مخدوم شاہ محمود قریشی ایک روزہ دورے کے دوران افغانستان کے عبوری وزیراعظم ملا حسن آخوند، وزیر خارجہامیر خان متقی و دیگر قیادت سے ملاقات کریں گے۔

مزید پڑھیں:
انسانی المیے سے بچنے کے لیے دنیا افغانستان کی مدد کرے، آرمی چیف

افغانستان میں معاشی صورت حال کو بہتر بنانے کے لیے بین الاقوامی تعاون ضروری ہے، شاہ محمود قریشی

ان ملاقاتوں میں دو طرفہ تعلقات کے تمام پہلوؤں ، باہمی دلچسپی کے شعبوں بالخصوص تجارت میں دو طرفہ تعاون بڑھانے کے مختلف طریقوں پر غور و خوض کیا جائے گا، وزیر خارجہ دیگر افغان قائدین سے بھی ملاقاتیں کریں گے اور افغان قائدین کو افغانستان میں امن و امان کے قیام اور آئندہ کے لائحہ عمل کے حوالے سے پاکستان کے نقطہ نظر سے آگاہ کریں گے۔