نوجوان وطن عزیز کیلئے سیاسی ، سفارتی اور عسکری جنگ لڑنے کی تیاری کریں، صدر آزاد کشمیر

مظفرآباد: آزاد جموں و کشمیر کے صدر سردار مسعود خان نے طلبہ اور نوجوانوں پر زور دیا ہے کہ وہ اپنی تعلیم کے ساتھ وطن عزیز کی سلامتی و دفاع اور کشمیر کی آزادی کے لیے بھی اپنے آپ کو تیار کریں۔

آزاد جموں و کشمیر یونیورسٹی کے کنووکیشن سے خطاب کرتے ہوئے صدر آزاد کشمیر اور یونیورسٹی کے چانسلر سردار مسعود خان نے طلبہ کو ملک اور قوم کا مستقبل قرار دیتے ہوئے اُن پر زور دیا کہ طلبہ تعلیم کی دوڑ میں مقبوضہ کشمیر کو مت بھولیں ۔

بھارت نے جس جنگ کا آغاز کیا وہ مقبوضہ کشمیر تک محدود نہیں رہے گی بلکہ بھارتی حکمرانوں نے اسے پورے بھارت میں پھیلا دیا اور اُن کا اگلا ہدف آزاد کشمیر ، گلگت بلتستان اور پاکستان ہے۔

بھارت اعلانیہ کہہ رہا ہے وہ آزاد کشمیر پر حملہ کر کے اسے مقبوضہ کشمیر کی طرح اپنی کالونی بنائے گا اور اس مقصد کے لیے وہ جعلی نقشے تیار کر کے آزاد کشمیر اور گلگت بلتستان کو بھارت کا حصہ دکھا رہا ہے۔

یہ بھی پڑھیں: مقبوضہ جموں و کشمیر میں کرفیو 137ویں روز میں داخل، سردی اور برفباری جاری

مودی حکومت کی سر پرستی اورپشت پناہی میں کام کرنے والی آر ایس ایس چار لاکھ نوجوان لڑکیوں اور لڑکوں کو فوجی تربیت دے کر اُنہیں آزاد کشمیر پر حملہ کرنے کے لیے تیار کر رہی ہے ۔ ان حالات میں ہمارے نوجوانوں پر یہ فرض ہے کہ وہ بھی وطن عزیز کے ایک ایک انچ کی حفاظت کر نے کے لیے اپنے آپ کو تیار کریں ۔

اُنہوں نے کہا کہ وقت آگیا ہے کہ آزاد کشمیر کے نوجوان تعلیمی اعتبار سے اپنے آپ کو اس قابل بنائیں کہ وہ ایک جانب نیویارک ، واشنگٹن ، لندن ، برسلز اور جنیوا میں کشمیر کے لیے سیاسی و سفارتی جنگ لڑنے کے قابل ہو سکیں ۔

اور دوسری طر ف مقبوضہ کشمیر میں اپنی بہنوں اور بھائیوں کی مدد کر کے بھارت کو یہ پیغام دیں کہ وہ مقبوضہ کشمیر میں اُس کی فوج کے ظلم کا حساب اُس کی آئندہ نسلوں سے بھی لیں گے ۔

اُنہوں نے کہا کہ نوجوان پوری جرات ، عزم اور حوصلے کے ساتھ اُٹھیں اور یہ ثابت کر دیں کہ کشمیری اپنی لاشیں گنیںگے اور نہ ہی دنیا کو یہ بتائیں کہ بھارت نے اتنے ہزار خواتین کی بے حرمتی کر دی ہے ۔