کراچی، کالا پل ریلوے اراضی پر تجاوزات کیخلاف آپریشن پیر تک روک دیا گیا

کراچی: کلفٹن اور کراچی کنٹونمٹ کی حدود کالا پل سی ایریا میں تجاوزات کیخلاف آپریشن جاری، درجنوں مکانات اور تجاوزات مسمار کردی گئیں۔

سپریم کورٹ آف پاکستان کے احکامات کے بعد ریلوے انتظامیہ نے سرکاری اراضی پر قائم تعمیرات گرانے کیلئے کارروائیاں تیز کردیں، کالا پل سی ایریا کے علاقے میں عرصہ دراز سے قائم غیر قانونی مکانات اور ریلوے لائنوں کے قریب قائم تجاوزا ت کا خاتمہ کیا جارہا ہے۔

ایم ایم نیوز کے سروے کے دوران ریلوے انتظامیہ نے بتایا کہ واگزار کروائی گئی جگہ پر سیوریج لائن ڈالی جائیگی، ان کا کہنا ہے کہ لوگوں نے نالے کی زمین پر گھر اور تعمیرات قائم کررکھی تھیں تاہم عدالتی احکامات کے بعد زمین خالی کروائی جارہی ہے۔

مزید پڑھیں:کراچی، کالا پل کے قریب سی ایریا میں انسدادِ تجاوزات آپریشن شروع

اس حوالے سے علاقہ مکینوں میں شدید اشتعال پایا جارہا ہے، مکینوں کا کہنا ہے کہ حکومت پہلے متبادل زمین دے اسکے بعد کارروائی کرے۔

متاثرین نے کہا کہ ہم 1960سے یہاں مقیم ہیں اور تمام اداروں کو باقاعدہ ٹیکس اور بلز بھی ادا کرتے ہیں لیکن یک جنبش قلم ہمارے گھر مسمار کرنے کا فیصلہ کردیا گیا ہے جو کہ ناانصافی ہے۔

ایم ایم نیوز کے سروے میں یہ بات بھی سامنے آئی ریلوے انتظامیہ کی جانب سے پہلے پٹریوں سے 50 فٹ تک تجاوزات ہٹائی جارہی تھیں تاہم مکینوں اور انتظامیہ کے درمیان مذاکرات کے بعد اب 30 فٹ تک جگہ خالی کروائی جارہی ہے ۔

مکینوں نے درخواست کی ہے کہ 30 کے بجائے اگر 25 فٹ تک زمین خالی کروائی جائے تو وہ اس کیلئے تیار ہیں دوسری جانب رکن قومی اسمبلی و پی ٹی آئی رہنماء آفتاب صدیقی کی درخواست پر آپریشن پیر تک روک دیا گیا ہے۔