خطے میں پائیدار امن کیلئے مسئلہ کشمیر کا حل ناگزیر ہے، چوہدری سرور

کراچی :گورنر پنجاب چوہدری محمد سرور نے عالمی برادری پر زور دیا کہ وہ افغانستان میں امن اور استحکام کو یقینی بنانے اور خطے میں پائیدار امن کے لیے جموں و کشمیر کے بارے میں اقوام متحدہ کی قراردادوں پر عمل درآمد کے لیے موثر کردار ادا کرے۔

ان خیالات کا اظہار انہوں نے مرکزی نائب صدر پی ٹی آئی اور سندھ اسمبلی میں قائد حزب اختلاف حلیم عادل شیخ کے ہمراہ کی رہائش گاہ پر میڈیا کے نمائندوں سے گفتگو کرتے ہوئے کیا۔

اس موقع پر پی ٹی آئی کے اراکین سندھ اسمبلی و پی ٹی آئی رہنما اراکین اسمبلی سعید آفریدی، شاہنواز جدون، ملک شہزاد اعوان پی ٹی آئی رہنماء حاجی مظفر ، حاجی نثار آرائیں اورعامر ابڑو بھی موجود تھے۔

گورنر پنجاب چوہدری محمد سرور نے کہا کہ افغانستان بڑی تبدیلیوں سے گزر رہا ہے اور پاکستان پہلے دن سے کسی دوسرے ملک کے اندرونی معاملات میں عدم مداخلت کی واضح پالیسی رکھتا ہے۔

وزیراعظم عمران خان نے 18 سال قبل کہا تھا کہ جنگ افغان مسئلے کا حل نہیں ہے اور تمام فریقین کے درمیان بات چیت ہی پائیدار حل تک پہنچنے کا واحد راستہ ہے ۔

چوہدری سرور نے مزید کہا کہ وہ اس وقت کے برطانوی پارلیمنٹ کے رکن کی حیثیت سے بھی افغانستان پر حملے کی مخالفت کی تھی اور پرامن حل پر زور دیا تھا۔ گورنر پنجاب نے عالمی برادری سے اپیل کی کہ وہ اس سلسلے میں موثر کردار ادا کرے کیونکہ افغانستان میں امن و استحکام نہ صرف افغانستان بلکہ پاکستان ، خطے اور پوری دنیا میں امن کے لیے اہم ہے۔

غیر قانونی مقبوضہ جموں و کشمیر کے لوگوں کی حالت زار پر روشنی ڈالتے ہوئے چوہدری سرور نے اس عزم کا اعادہ کیا کہ پاکستان وادی کے معصوم لوگوں پر قابض افواج کے جابرانہ اور وحشیانہ اقدامات کے خلاف آواز اٹھاتا رہے گا۔

انہوں نے عالمی برادری پر زور دیا کہ وہ جموں و کشمیر پر اقوام متحدہ کی قرارداد پر عمل درآمد کو یقینی بنائے اور کشمیریوں کو حق خودارادیت دے تاکہ وہ قابض بھارتی افواج کے مظالم سے بچ سکیں اور اپنے مستقبل کا فیصلہ خود کر سکیں۔

انہوں نے کہا کہ پی ٹی آئی کی حکومت معیشت کو مضبوط بنانے پر مرکوز ہے کیونکہ یہ واضح ہے کہ خودمختار خارجہ پالیسی اور عوام کو ریلیف یقینی بنانے کے لیے مضبوط معیشت ضروری ہے۔ انہوں نے مشاہدہ کیا کہ کورونا کی صورتحال کے دوران وفاقی حکومت کے دانشمندانہ اقدامات کی وجہ سے پاکستان کی معیشت نے مثبت اشارے دکھائے۔

معاشی دباؤ کے باوجود پاکستان کی برآمدات 20 ارب ڈالر سے بڑھ کر 25 ارب ڈالر ہو گئی ہیں جبکہ کرنٹ اکاؤنٹ خسارہ جو 20 ارب ڈالر تھا جب پی ٹی آئی کی حکومت آنے کے بعد کم ہو کر 2 ارب ڈالر رہ گئی ہے گورنر پنجاب نے مزید کہا وفاقی حکومت کراچی کے لوگوں کو زیادہ سے زیادہ ریلیف دینے کے لیے اقدامات کر رہی ہے۔

مزید پڑھیں:ماضی میں ماہی گیری پرکبھی توجہ نہیں دی گئی،محمود مولوی ملک کا اثاثہ ہیں، علی زیدی

انتخابی اصلاحات سے متعلق ایک سوال کا جواب دیتے ہوئے چوہدری سرور نے کہا کہ انتخابی اصلاحات ایک پیچیدہ مسئلہ ہے اور تمام سیاسی جماعتوں کو ایک ساتھ بیٹھنے ، تفصیل سے تبادلہ خیال کرنے اور تمام سیاسی جماعتوں اور سول سوسائٹی کے اتفاق رائے سے حل پر پہنچنے کی ضرورت ہے۔

یہ مشاہدہ کیا گیا کہ ہر الیکشن میں شکست خوردہ جماعتوں نے دھاندلی اور بے ضابطگیوں کا شور مچایا تو ہمیں ایک فول پروف انتخابی نظام کی ضرورت تھی جو اس طرح کے طریقوں کا خاتمہ کر سکے۔

اپوزیشن لیڈر سندھ اسمبلی حلیم عادل شیخ نے اس موقع پر خطاب کرتے ہوئے گورنر پنجاب کو خوش آمدید کہا اور کہا کہ چوہدری سرور نے دنیا میں ملک کا نام روشن کیا۔

انہوں نے گزشتہ سال سیلاب کے بعد سندھ کے لوگوں کو انسانی امداد کی فراہمی میں ان کے فعال کردار کی بھی تعریف کی۔ حلیم عادل نے کہا کہ گورنر پنجاب سندھ اور بلوچستان میں پینے کے صاف پانی کی فراہمی پر بھی کام کر رہے ہیں۔