گوگل نیوز پر ہمیں فالو کریںاسلام آباد: وزیر اعظم عمران خان کا کہنا ہے کہ محسن انسانیت حضرت محمد ﷺ کے یوم پیدائش پر امت مسلمہ کو مبارکباد پیش کرتا ہوں ،دعا ہے ایسے مبارک ماہ ہماری زند گی میں بار بار آتے رہیں۔
وزیر اعظم عمران خان نے عید میلاد النبی ﷺ کے موقع پر اپنے پیغام میں کہا کہ میں آج محسن انسانیت حضرت محمد ﷺ کی پیدائش کے دن پر پوری ملت اسلامیہ اور اہل وطن کو بالخصوص مبارک باد پیش کرتا ہوں اور دعا کرتا ہوں کہ ایسے مبارک دن ہماری زند گی میں بار بار آتے رہیں۔
وزیر اعظم عمران خان نے کہا کہ آپ ﷺ نے دشمنوں سے اپنے آپ کو صادق اور امین کہلوایا، آپ ﷺ نے تبلیغ اسلام اس وقت شروع کی جب لوگوں نے انہیں صادق و امین تسلیم کر لیا تھا۔ آپ ﷺ نے کبھی جھوٹ نہیں بولا اور نہ کبھی امانت میں خیانت فرمائی۔
تاریخ انسانیت کی پہلی فلاحی ریاست کا تصور سب سے پہلے اسلام ہی نے دیا، ریاست مدینہ کے یہ وہ روشن پہلو تھے جو اُس زمانے کی کسی ایک ریاست میں بھی رائج نہیں تھے، رسول اکرم ﷺ اور خلفائے راشدین نے اسلام کے اوائل میں اس تصور کو عملی جامہ پہنایا۔
انہوں نے کہا کہ آج کی مہذب دنیا میں فلاحی ریاست کا جو اعلیٰ سے اعلیٰ تصور ہے وہ ہمارے آقا حضرت محمد ﷺ نے آج سے 1400 سال قبل اس دورِ جاہلیت کے معاشرے میں ریاست مدینہ کی صورت میں قائم کر کے دکھایا اور اس اہم فیصلے کو خلفائے راشدین نے عدل و مساوات کی بنیاد پر چار چاند لگائے جو تاریخ عالم کا ایک سنہری باب ہے۔
مزید پڑھیں: عیدمیلادالنبی ﷺ ملک بھرمیں عقیدت و احترام سے منائی جا رہی ہے
