پاکستان نے اقوام متحدہ انسانی حقوق کونسل میں کشمیر کا مؤقف کامیابی سے پیش کیا۔ شاہ محمود قریشی

ستمبر 11, 2019

شاہد شاہنواز

گوگل نیوز پر ہمیں فالو کریں

اسلام آباد:وزیر خارجہ شاہ محمود قریشی نے کہا ہے کہ پاکستان نے اقوام متحدہ کی انسانی حقوق کونسل میں کشمیر کا مؤقف کامیابی سے پیش کیا ہے۔ کشمیریوں کو زندگی گزارنے میں بھرپور مشکلات کا سامنا ہے۔

سماجی رابطے کی ویب سائٹ ٹوئٹر پر اپنے پیغام میں وزیر خارجہ شاہ محمود قریشی نے کہا کہ مقبوضہ علاقے میں کشمیریوں کا قتل عام ہو رہا ہے اور انہیں زندگی کے مختلف معاملات میں بھارتی فوج کی طرف سے جارحیت اور بربریت کا سامنا ہے۔

یہ بھی پڑھیں: بابائے قوم قائد اعظم محمد علی جناح کی 71ویں برسی : گورنر اور وزیر اعلیٰ سندھ کی مزارِ قائد پر حاضری

وزیر خارجہ نے کہا کہ ہم نے مقبوضہ جموں و کشمیر کی درست تصویر دنیا کے سامنے پیش کی جسے بھارت اقوامِ عالم سے چھپانے کے لیے بے چین اور پریشان ہے۔ پاکستان کشمیری عوام کے ساتھ کھڑا ہے اور ہم ہر قیمت پر ان کا دفاع کریں گے۔

Today at #HRC42 we presented the real story of Indian Occupied Jammu /Kashmir that India is desperate to hide from all. For the last 6 weeks over 8M Kashmiris have been caged by illegal occupation nearing 1M troops. India has transformed IOJK into the largest prison in the world

— Shah Mahmood Qureshi (@SMQureshiPTI) September 10, 2019

شاہ محمود قریشی نے کہا کہ گزشتہ 6 ہفتوں کے دوران 10 لاکھ غیر قانونی قابض بھارتی فوج نے 80 لاکھ کشمیریوں کوگرفتار کر لیا۔ بھارت نے مقبوضہ جموں و کشمیر کو دنیا کے سب سے بڑے قید خانے میں تبدیل کردیا ہے۔

انہوں نے کہا کہ کشمیر کی آئینی حیثیت تبدیل کرنے کا یکطرفہ بھارتی اقدام جنیوا کنونشن کی خلاف ورزی اور اس حوالے سے غیر قانونی ہے کہ اقوام متحدہ کی سیکورٹی کونسل بین الاقوامی قانون کے تحت کشمیر کو متنازعہ علاقہ تسلیم کرچکی ہے۔ بھارت کی طرف سے ایسے اقدامات کو اندرونی معاملہ قرار دینا یکسر غلط ہے۔

India’s unilateral action altering status of Occupied Jammu&Kashmir, recognized as disputed territory by UN Security Council, is illegal under Intl law. Naked foreign occupation contravening Geneva Convention. Assertion these actions are ‘internal affair’ patently false. #HRC42 https://t.co/w9liK8B24P

— Shah Mahmood Qureshi (@SMQureshiPTI) September 10, 2019

شاہ محمود قریشی کا کہنا تھا کہ اقوام متحدہ کی ہیومن رائٹس کونسل میں مقبوضہ وادی میں مظالم کے خلاف پچاس سے زائد ممالک کا مشترکہ بیان تاریخی اہمیت کا حامل ہے۔ ہم ہیومن رائٹس کونسل سے مجوزہ اقدامات پر فوری عمل درآمد کا مطالبہ کرتے ہیں۔

Pakistan today also announces the delivery of a historic joint statement on behalf of over 50 countries to the UN Human Rights Council. For this, we asked that the Council immediately take the following steps #HRC42 pic.twitter.com/538RNc5je4

— Shah Mahmood Qureshi (@SMQureshiPTI) September 10, 2019

واضح رہے کہ ہیومن رائٹس کونسل کے تحت 50 ممالک کی طرف سے مجوزہ اقدامات میں کشمیریوں کے بنیادی انسانی حقوق، آزادی اور زندگی کے تحفظ سمیت فوری طور پر کرفیو ہٹائے جانے کے مطالبات شامل ہیں۔

ہیومن رائٹس کونسل ممالک نے یہ مطالبہ بھی کیا ہے کہ مقبوضہ کشمیر میں انٹرنیٹ اور ذرائع مواصلات پر سے فوری پابندی ہٹائی جائے اور حریت رہنماؤں کو آزاد کیا جائے۔ اس میں فوج اور طاقت کے استعمال اور پیلٹ گنوں پر پابندی لگانے کا مطالبہ بھی شامل ہے۔

یاد رہے کہ وزیر اعظم پاکستان عمران خان نے مسئلہ کشمیر کے حوالے سے 13 ستمبرکے دن مظفر آباد میں ایک بڑا جلسہ کرنے کا اعلان کیا ہے اور کہا ہے کہ ہم کشمیریوں کو یقین دلائیں گے کہ پاکستان ان کے ساتھ کھڑا ہے۔