پاکستان میں کورونا سے 7اموات، 319 افراد متاثر

اسلام آباد: پاکستان میں کورونا وائرس کے کیسز میں مزید کمی، ملک میں 319 افراد وباء سے متاثر،7 مریض انتقال کرگئے۔

ہفتہ کی صبح نیشنل کمانڈ اینڈ آپریشن سینٹر کے جاری کردہ اعدادوشمار کے مطابق پاکستان میں گزشتہ 24 گھنٹوں کے دوران کورونا وائرس سے مزید 7اموات اور 319 مثبت کیسز ریکارڈ کیے گئے ۔

این سی او سی کے اعداد و شمار کے مطابق 7اموات کے اضافے کے بعد اموات کی مجموعی تعداد بڑھ کر 28ہزار655 ہو گئی ہے جبکہ نئے 319 کیسز کو شامل کرنے کے بعد اب متاثرین کی تعداد 1281559 ہو گئی ہے۔

گزشتہ 24 گھنٹوں کے دوران پاکستان بھر میں مجموعی طور پر 39200 ٹیسٹ کیے گئے جب کہ مثبت کیسز کا تناسب صفر اعشاریہ 81 فیصد رہا۔

مزید پڑھیں:کورونا کا زور ختم، طلبہ کے امتحانات مکمل نصاب سے لیے جائیں گے۔وزیرِ تعلیم

واضح ہے کہ کورونا وائرس کے کیسز میں نمایاں کمی کے بعد کراچی سمیت سندھ بھر میں عائد کی گئی پابندیوں میں مزید نرمی کردی گئی، 16نومبر کو اس حوالے سے نوٹیفکیشن بھی جاری کر دیا گیا تھا۔

کورونا وائرس کی وبا کے حوالے سے عائد پابندیوں میں نرمی کا محکمہ داخلہ سندھ کا نوٹیفکیشن 30 نومبر تک نافذ العمل رہے گا۔

نوٹیفکیشن میں محکمہ داخلہ سندھ کا کہنا ہے کہ صوبے بھر میں ہفتے کے 7 دن کاروبار کھلا رکھا جا سکے گا تاہم مارکیٹ اور بازار رات 10 بجے تک کھلے رہیں گے۔

محکمہ داخلہ سندھ کے مطابق صوبے بھر میں ہونے والی انڈور تقریبات میں اب 500افراد کو شرکت کی اجازت ہو گی۔

نوٹیفکیشن میں محکمہ داخلہ سندھ نے کہا ہے کہ آوٹ ڈور تقریبات میں 1000افراد کو شرکت کی اجازت ہو گی۔محکمہ داخلہ سندھ کا اپنے جاری کیئے گئے نوٹیفکیشن میں کہنا ہے کہ انڈور اور آوٹ ڈؤر تقریبات میں ویکسی نیٹڈ افراد ہی شرکت کر سکیں گے۔