ویسٹ انڈیز کیخلاف سیریز برابر کرنے کیلئے تیاری مکمل ہے، محمد رضوان

کنگسٹن :قومی کرکٹ ٹیم کے وکٹ کیپربیٹسمین و نائب کپتان محمد رضوان کاکہنا ہے کہ جمیکا کے سبینا پارک میں آئی سی سی ورلڈ ٹیسٹ چیمپئن شپ کے دوسرے ٹیسٹ میں ویسٹ انڈیز کیخلاف سیریز برابر کرنے کیلئے تیاری مکمل ہے۔

ویڈیو کانفرنس کے ذریعے میڈیا سے گفتگو کرتے ہوئے محمدرضوان نے کہا کہ پہلے ٹیسٹ میں ہم نے اچھا کھیل پیش کیا اور جیت بہت قریب تھی لیکن بدقسمتی سے ہم آخر میں ہار گئے،اب اگلا میچ جیتنے اور سیریز برابر کرنے کا ہدف رکھتے ہیں۔محمد رضوان نے کہا کہ ہم نے تجربات سے سیکھا ہے اور اگلے میچ میں بہتر کارکردگی دکھانے کی کوشش کرینگے۔

مزید پڑھیں:پاکستان کے خلاف ون ڈے سیریز، کابل میں افغان کرکٹرز کی تیاریاں شروع

واضح رہے کہ پاکستان اور ویسٹ انڈیز کے درمیان دوسرا ٹیسٹ بھی جمیکا کے کنگسٹن کا گراؤنڈ ہی ہوگایہ وہی گراؤنڈ ہے جہاں پہلے ٹیسٹ میں دلچسپ مقابلے کے بعد ویسٹ انڈیز نے ایک وکٹ سے کامیابی حاصل کی تھی۔

کنگسٹن میں پاکستان اور ویسٹ انڈیز کی ٹیموں نے آخری معرکے کے لیے بھرپور پریکٹس کی ہے۔ امکان ہے کہ ٹیم پاکستان ایک تبدیلی کے ساتھ میدان میں اترے گی۔ذرائع کے مطابق یاسر شاہ کی جگہ نعمان علی کو کھلائے جانے کا امکان ہے۔

ہوم ٹیم جسے سیریز میں 0-1 کی برتری حاصل ہے اس میں کسی تبدیلی کا امکان نہیں ہے تاہم دونوں جانب سے فائنل الیون کا فیصلہ ٹاس کے وقت ہی ہو گا، ٹیسٹ میچ پاکستانی وقت کے مطابق رات 8 بجے شروع ہوگا۔