گوگل نیوز پر ہمیں فالو کریںنیوزی لینڈ کی کرکٹ ٹیم اتوار کی صبح پاکستان کے خلاف پانچ میچوں کی ٹی ٹوئنٹی سیریز کے لیے پہنچی، پہلا میچ 18اپریل کو پنڈی اسٹیڈیم میں شیڈول ہے۔
یہ ایک سال کے دوران نیوزی لینڈ کا تیسرا دورہ پاکستان ہے جس نے اس سے قبل ٹیسٹ اور ون ڈے سیریز میں شرکت کی تھی۔
15 کھلاڑیوں اور 10 آفیشلز پر مشتمل نیوزی لینڈ کے اسکواڈ کو وی وی آئی پیز کی طرح اعلیٰ سطح کی سیکورٹی فراہم کی گئی ، ایئرپورٹ سے اسلام آباد میں ان کے ہوٹل تک سیکورٹی اہلکار موجود تھے۔
اتوار کو ٹیم کے ارکان کے لیے مکمل آرام کے لیے نامزد کیا گیا ہے،کیوی ٹیم پیر کی شام سے اسلام آباد کلب کرکٹ گراؤنڈ اور بعد ازاں پنڈی اسٹیڈیم میں ٹریننگ شروع ہوگی۔
روانگی سے قبل نیوزی لینڈ کی ٹیم کو اپنے تربیتی سیشن کے آخری مراحل کے دوران انجری کے باعث دھچکے کا سامنا کرنا پڑا۔ فن ایلن کمر کی انجری اور ایڈم ملنے کو ٹخنے کی انجری کی وجہ سے پاکستان کے خلاف پانچ میچوں کی ٹی ٹوئنٹی سیریز سے باہر کردیا گیا ہے۔ وکٹ کیپر بلے باز ٹام بلنڈل اور آل راؤنڈر زیک فولکس کو متبادل کے طور پر اسکواڈ میں شامل کیا گیا ہے۔
نیوزی لینڈ کے نو نامور کرکٹرز فی الحال ہندوستان میں آئی پی ایل میں مصروف ہیں، جن میں ٹرینٹ بولٹ، ڈیون کونوے، لوکی فرگوسن، میٹ ہنری، ڈیرل مچل، گلین فلپس، ریچن رویندرا، مچ سینٹنر، اور کین ولیمسن شامل ہیں۔
ان میں سے کسی کو بھی پاکستان سیریز کے لیے ٹیم میں شامل ہونے کی ہدایت یا درخواست نہیں کی گئی۔ ٹام لیتھم خاندان کے ساتھ مصروف اور ٹم ساؤتھی کام کے بوجھ کی وجہ سے آرام کر رہے ہیں۔
کیوی ٹیم کپتان مائیکل بریسویل ، ٹام بلنڈل ، مارک چیپ مین، جوش کلارکسن، جیکب ڈفی، زیک فولکس، ڈین فاکس کرافٹ، بین لِسٹر، کول میک کونچی، جمی نیشم، ول اوورکے، ٹم رابنسن، بین سیئرز، ٹم سیفرٹ ، ایش سودھی پر مشتمل ہے۔
عملے کے ارکان میں سائمن انسلے (منیجر)، میٹ لانگ (ایس اینڈ سی)، گیری سٹیڈ (ہیڈ کوچ)، لیوک رونچی (بیٹنگ کوچ)، جیمز فوسٹر (اسسٹنٹ کوچ)، برینڈن ڈونکرز (بولنگ کوچ)، پیٹ میک ہگ (ڈاکٹر)، گیون کراس (فزیو) )، ٹیری منش (سیکورٹی) شامل ہیں۔
