سینیٹ اور قومی اسمبلی میں کشمیریوں سے یکجہتی کی قراردادیں متفقہ طور پر منظور

اسلام آباد: سینیٹ اور قومی اسمبلی میں کشمیریوں سے یکجہتی کی قراردادیں متفقہ طور پر منظورکرلی گئیں،قراردادوں میں کشمیریوں کی جدوجہد آزادی کو سلام پیش کرتے ہوئے بھارتی افواج کے مظالم کی شدید مذمت کی گئی۔

چیئرمین صادق سنجرانی کی زیر صدارت سینیٹ کا اجلاس شروع ہوا جس میں قائد ایوان شبلی فراز نے کشمیری عوام سے یکجہتی کی قرارداد پیش کی۔

قرارداد میں کہا گیا کہ یہ ایوان کشمیریوں کی قربانیوں پر اقوام عالم سے نوٹس لینے کا مطالبہ کرتا ہے۔ کشمیر میں انسانی حقوق کی خلاف ورزیوں کیخلاف عالمی تحقیقات کرائی جائیں۔

قرارداد میں مطالبات کیے گئے کہ بھارت سیاہ قوانین واپس لےاور کشمیر میں جاری کرفیو ختم کیا جائے اور مسئلہ کشمیر پر او سی آئی کا خصوصی اجلاس فوری بلایا جائے۔

مزید پڑھیں: بھارت کا بڑھتا ہوا جنگی جنون خطے کے لئے خطرہ ہے، اعجاز احمد شاہ

دوسری جانب قومی اسمبلی نے بھی کشمیری عوام کے ساتھ اظہار یکجہتی کی قرارداد متفقہ طور پر منظور کر لی۔ یہ قرارداد چیئرمین کشمیر کمیٹی فخر امام کی جانب سے پیش کی گئی۔

قومی اسمبلی سے منظور کردہ قرارداد میں مطالبہ کیا گیا کہ کشمیر میں انسانی حقوق کی خلاف ورزیوں کیخلاف عالمی سطح پر تحقیقات کرائی جائیں، کشمیر میں کرفیو ختم کیا جائے، ملٹری آبزرورز گروپ کشمیر میں تعینات کیا جائے اور او سی آئی کا اجلاس فوری بلایا جائے۔