گوگل نیوز پر ہمیں فالو کریںسابق صدر آصف علی زرداری کے میڈیکل بورڈ کو از سر نو ترتیب دے کراس میں طب کے مختلف شعبہ جات سے ماہر ترین ڈاکٹرز کو شامل کیا گیا ہے، تاہم ذاتی معالج کو بورڈ میں شامل نہ کرتے ہوئے صرف مشاورت تک محدود کردیا گیا۔
حکومتی انتظامیہ نے سابق صدر آصف علی زرداری کے میڈیکل بورڈ کی تشکیلِ نو کے دوران اس میں نیورو سرجن، امراضِ قلب اور نیورولوجی کے ماہرین کو شامل کیا ہے۔
آصف زرداری میڈیکل بورڈ کے سابق سربراہ ڈاکٹر شجیع صدیقی کو سربراہ برقرار رکھا گیا ہے جبکہ بورڈ کے دیگر ڈاکٹرز میں ڈاکٹر مظہر بادشاہ اور ڈاکٹر نذیر بھٹی کے نام نمایاں ہیں۔
پیپلز پارٹی کے شریک چیئرمین اور سابق صدر آصف علی زرداری کے از سر نو ترتیب دئیے گئے میڈیکل بورڈ کو ہدایت کی گئی ہے کہ سابق صدر کی رپورٹس پر حسبِ ضرورت ذاتی معالج سے مشاورت کرے، تاہم معالج کو بورڈ کا حصہ نہیں بنایا گیا۔
یاد رہے کہ اس سے قبل عدالت نے سابق صدر آصف علی زرداری و ہمشیرہ فریال تالپور کی درخواستِ ضمانت پر سابق صدر کے لیے میڈیکل بورڈ بنانے کا حکم دے دیا۔
اسلام آباد ہائی کورٹ میں 4 دسمبر کو سابق صدر آصف علی زرداری و رکنِ سندھ اسمبلی فریال تالپور کی درخواستِ ضمانت پر سماعت ہوئی۔ چیف جسٹس ہائی کورٹ اطہر من اللہ اور جسٹس عامر فاروق نے سماعت کی۔
پارک لین کیس اور میگا منی لانڈرنگ کیس کی سماعت کے دوران ججز کے خصوصی بینچ نے ایم پی اے فریال تالپور کی درخواستِ ضمانت کے مؤقف کو مدنظر رکھتے ہوئے نیب حکام کو جواب طلبی کا نوٹس جاری کردیا۔
مزید پڑھیں: آصف زرداری کی درخواست پر میڈیکل بورڈ بنانے کا حکم
