کے پی کے کے معذور شخص کا قبضہ مافیا کے خلاف احتجاج، وزیراعلیٰ سے انصاف کی اپیل

اسلام آباد: خیبر پختونخوا کے ضلع مردان سے تعلق رکھنے والا معذور شخص محمد طارق نے قبضہ مافیا کی جانب سے گھر پر قبضے کے خلاف احتجاج کیا ہے۔ قبضہ مافیا کے خلاف درخواست دینے پر پولیس الٹا ایف آئی آر متاثرہ شخص کے خلاف درج کرلی ہے۔

ایم ایم نیوز سے گفتگو کرتے ہوئے متاثرہ شخص محمد طارق کا کہنا تھا کہ میں دونوں ٹانگوں سے اور دونوں ہاتھوں سے معذور ہوں ہو دل کا مریض ہوں، دل میں دو سٹنٹ ڈلے ہوئے ہیں۔ کچھ عرصہ قبل مقامی لوگوں نے مجھ سے گھر کرائے پر لیا جس کا میں نے ان کے ساتھ باقاعدہ ایگریمنٹ کیا پھر دو ماہ قبل جب میں نے ان کو کہا کہ میرا گھر خالی کردیں تو انہوں نے دعویٰ کیا کہ ہم نے یہ گھر خرید لیا ہے لہذا ہم گھر خالی نہیں کریں گے۔

یہ بھی پڑھیں 

چائے پتی کمپنی کے مالک کو ایک کروڑ روپے بھتے کی پرچی موصول، پولیس نے تفتیش شروع کردی

نور مقدم قتل کیس، عدالت کا عصمت جعفر کے خلاف شواہد پیش کرنے کا حکم

متاثرہ شخص کا کہنا تھا کہ جب میں نے پولیس کو ان کے خلاف کارروائی کے لئے درخواست دی تو پولیس نے کہا کہ ان لوگوں کے پاس گھر کی ملکیت کے کاغذات ہیں۔ میں نے کہا کہ انہوں نے گھر کس سے خریدا ہے اس گھر کا مالک تو میں ہوں۔ اے ایس آئی۔ ایس ایچ او۔ اور ڈی ایس پی انعام جان نے قبضہ مافیا کی طرف داری کرنا شروع کر دی اور مجھے برا بھلا کہا۔

قبضہ مافیا کے کہنے پر پولیس نے مجھے پر بہیمانہ تشدد کیا اور مجھے گھر چھوڑنے پر مجبور کیا، میرا کوئی اور ذریعہ معاش نہیں، میں گھر کرائے پر دے کر اپنا گزر بسر کر رہا تھا لیکن ظالموں نے یہ سہارا بھی چھین لیا ہے، میرے چھوٹے چھوٹے بچے ہیں اب میں بے گھر ہوں۔

محمد طارق کا کہنا تھا کہ میں نے کے پی کے کے آئی جی پولیس سے ملنے کے لیے رابطہ کیا، لیکن ملاقات نہ ہو سکی۔ انہوں نے کہا کہ میرے گھر پر قبضہ کرنے میں اہم کردار ڈی ایس پی کا انعام جان کا ہے جو ابھی بھی مجھے جان سے مارنے کی دھمکیاں دے رہا ہے میں تھک ہار کر اسلام آباد آیا ہوں، کہ شاید میری بات وزیراعظم عمران خان تک پہنچ سکے اور میری داد رسی ہو سکے۔

انہوں نے کہا ہے کہ میں اپیل کرتا ہوں وزیراعلی خیبرپختونخوا سے کہ مجھے فوری طور پر انصاف دیا جائے ملزمان کے خلاف کاروائی کی جائے اور میرے گھر کا قبضہ چھڑایا جائے تاکہ میں اپنے بیوی بچوں کے ساتھ باعزت زندگی گزار سکوں۔