کراچی، گاڑی نہ روکنے پر ڈاکوؤں نے ٹیکسی ڈرائیور کو قتل کردیا

کراچی: سندھ کے صوبائی دارالحکومت کراچی میں امن و امان کی صورتحال پر قابو نہ پایا جاسکا، ڈاکوؤں نے گاڑی نہ روکنے پر ٹیکسی ڈرائیور ممتاز کو گولی مار کر قتل کردیا، مقتول ممتاز مسافروں کو ائیرپورٹ سے واپس گھر لارہا تھا۔

کراچی میں ڈکیتوں نے ایئرپورٹ سے نیوکراچی جانے والے مسافروں سے لوٹ مار کی کوشش کی اور گاڑی نہ روکنے پر ٹیکسی ڈرائیور کو قتل کردیا۔

پولیس نے بتایا کہ واقعہ بلال کالونی تھانے کی حدود نیو کراچی ڈیکا موڑ کے قریب پیش آیا، مقتول ممتازعمرے کی ادائیگی کیلئے جانیوالی فیملی کو ائیرپورٹ لیکر گیا تھا اور پرواز منسوخ ہونے پر مسافروں کو ائیرپورٹ سے واپس گھر لارہا تھا۔

یہ بھی پڑھیں:

کراچی کے مختلف علاقوں میں فائرنگ کے واقعات، 3 افراد جاں بحق، 4 زخمی

پولیس حکام نے جائے وقوعہ سے شواہد جمع کرلئے ہیں اور مزید تحقیقات کی جارہی ہیں، مقتول کا تعلق نتھیا گلی سے ہے، گرین ٹاؤن میں اکیلا رہائش پذیر تھا۔

لواحقین کا کہنا تھا کہ مقتول ممتاز کا بھائی ریاض بھی 8 سال قبل ڈکیتوں کی گولی کا نشانہ بنا تھا۔