فخر زمان اور شاہین شاہ آفریدی نے ای ایس پی این ایوارڈ 2021 جیت لیا

لاہور: پاکستان کرکٹ ٹیم کے بلے باز فخر زمان اور تیز گیند باز شاہین شاہ آفریدی نے 15ویں ای ایس پی این کرکٹ ایوارڈ میں بیٹنگ اور باؤلنگ کے اعزاز حاصل کر لیے۔

وانڈررز اسٹیڈیم میں میزبان جنوبی افریقہ کے خلاف فخر کے 155 گیندوں پر 193 رنز کی شاندار اننگز نے انھیں ایک روزہ کرکٹ کی بیٹنگ کیٹیگری میں ای ایس پی این ایوارڈ جیتنے میں مدد دی۔ فخر زمان کی جانب سے یہ اننگ ہدف تعاقب میں سب سے طویل اور اپنی اب تک سب سے بڑی اننگ تھی۔

فخر زمان نے جنوبی افریقہ میں نے 193 رنز کی یہ یادگار اننگ اس وقت کھیلی جب قومی کرکٹ ٹیم کے بیشتر بلے باز ہمت ہار چکے تھے۔ 

بائیں ہاتھ کے بلے باز نے وکٹ پر ٹھہر کر شاندار 193 رنز کی اننگ میں 18 چوکے اور 10 چھکے لگائے تھے۔

یہ بھی پڑھیں:آئی سی سی کی ون ڈے رینکنگ جاری، بابر اعظم پہلے نمبر پر براجمان

دریں اثنا، پاکستان کے نئے ابھرتے ہوئے بالر شاہین شاہ آفریدی نے ٹی ٹوئنٹی ورلڈ کپ 2021 میں بھارت کے خلاف اپنے زبردست باؤلنگ اسپیل کے لیے ٹی ٹوئنٹی باؤلنگ ایوارڈ اپنے نام کیا۔

21 سالہ شاہین شاہ آفریدی نے حالیہ ٹی ٹوئنٹی ورلڈ کپ میں بھارت کیخلاف شاندار باؤلنگ کی تھی اور اس میچ میں انہوں نے 4 اوورز میں 31 رنز کے عوض 3 وکٹیں حاصل کرکے پاکستان کی فتح کو یقینی بنایا۔ 

میچ کے پہلے ہی اوور میں شاہین آفریدی نے بھارت کے روہیت شرما کو آؤٹ کرکے قومی ٹیم کی فتح  کی بنیاد رکھی اور اپنے پورے اسپیل میں مخالف بلے بازوں کو کھل کر کھیلنے کا موقع نہیں دیا۔