گوگل نیوز پر ہمیں فالو کریںپنجاب میں اسمبلی کی تحلیل میں تاخیر سے ظاہر ہوتا ہے کہ تحریک انصاف اور مسلم لیگ (ق) میں تحلیل پر اختلاف ہے۔ عمران خان نے 26 نومبر کو راولپنڈی میں لانگ مارچ کے اختتام پر اپنے فیصلے کا اعلان کیا تھا۔ یہ سوچ کر کہ یہ مسلم لیگ (ن) کی قیادت والے اتحاد کو ایسے وقت میں فوری انتخابات کرانے پر مجبور کردیں گے کہ جب ان کی مقبولیت میں اضافہ ہوتا دکھائی دے رہا ہے۔
تاہم اب ایسا لگتا ہے کہ انہیں اپنی ہی پارٹی کے اندر سے بڑھتی ہوئی مخالفت کا سامنا ہے اور وہ اپنے اتحادی مسلم لیگ (ق) کے وزیر اعلیٰ چوہدری پرویز الٰہی کو قائل کرنے سے قاصر ہیں، جو پنجاب کا اقتدار چھوڑنے سے گریزاں ہیں۔
پی ٹی آئی رہنما فواد چوہدری نے ممکن ہے یہ انتباہ دیا ہوگا کہ اگر وزیراعلیٰ پنجاب اسمبلی کی تحلیل پر رضامند ہوجائیں گے تو وہ پی ٹی آئی کے اتحادی کے طور پر اگلے انتخابات میں حصہ لے سکتے ہیں۔
تاہم، وزیراعلیٰ پنجاب اور ان کے بیٹے مونس الٰہی دونوں کی بارہا یقین دہانیوں کے باوجود،انہوں نے شاید غور نہیں کیا کہ گجرات کے چوہدریوں کی دو شاخیں پی ٹی آئی سے بہتر جانتی ہیں کہ پاکستانی سیاست کا رخ کدھر ہے۔ امکان یہ ہے کہ اگر عمران خان واقعی کال دیتے ہیں تو مسلم لیگ (ق) ان کے حکم کی تعمیل نہیں کر پائے گی، چوہدری شجاعت اور پرویز الٰہی کے درمیان ہونے والے حالیہ رابطوں کی مونس الٰہی نے تصدیق کر دی ہے جس نے نئے سوالات کو جنم دیا ہے۔
وزیر داخلہ رانا ثناء اللہ نے عمران خان کو چیلنج کیا ہے کہ وہ دونوں صوبائی اسمبلیاں تحلیل کرکے آگے بڑھیں۔بہر حال، عمران خان کے لیے یہ کوئی ڈیڈ اینڈ نہیں ہے۔ سیاست میں کچھ بھی ممکن ہے اور سیاستدان ہمیشہ نازک صورتحال سے نکلنے کا راستہ نکالتا ہے۔
عمران خان کے لیے ایک راستہ یہ ہوسکتا ہے کہ وہ انتخابات پر اصرار کرنے اور گرتی ہوئی معیشت کو مزید دباؤ میں ڈالنے کے بجائے حکمراں اتحاد پی ڈی ایم کے ساتھ باضابطہ، براہ راست بات چیت شروع کریں، اور حکومت اور اپوزیشن دونوں کے لیے قابل قبول درمیانی راستہ تلاش کریں۔
