گوگل نیوز پر ہمیں فالو کریںصوبہ خیبر پختونخوا کے علاقے شمالی وزیرستان میں سیکورٹی خدشات کے پیش نظر مسلسل دوسرے روز بھی کرفیو نافذ کیا گیا ہے۔
ضلعی انتظامیہ کے مطابق شمالی وزیرستان میں صبح 6 بجے سے شام 6 بجے تک کرفیو نافذ رہے گا۔ اس دوران میرعلی، میران شاہ، دتہ خیل، رزمک اور بنوں کی طرف جانے والی مرکزی شاہراہوں پر آمد و رفت معطل رہے گی۔
انتظامیہ کا کہنا ہے کہ یہ فیصلہ علاقے میں موجود سیکورٹی خطرات کے پیش نظر کیا گیا ہے اور شہریوں کو ہدایت دی گئی ہے کہ وہ کرفیو کی پابندی کریں اور متبادل راستوں کا استعمال کریں۔
یہ امر قابل ذکر ہے کہ شمالی وزیرستان میں سیکورٹی صورتحال بدستور غیر مستحکم ہے۔ گزشتہ چند مہینوں کے دوران شدت پسندانہ کارروائیوں میں واضح اضافہ دیکھنے میں آیا ہے۔
اگرچہ ماضی میں شدت پسندوں کے خلاف کئی فوجی کارروائیاں کی گئیں تاہم اب بھی یہ علاقہ وقفے وقفے سے سیکورٹی فورسز، مقامی عمائدین اور شہریوں پر مہلک حملوں کا نشانہ بنتا رہتا ہے۔
ان حملوں کی ذمہ داری اکثر تحریک طالبان پاکستان (ٹی ٹی پی) اور اس سے منسلک گروہوں پر عائد کی جاتی ہے جنہیں قبائلی علاقوں میں دوبارہ منظم ہونے کا موقع ملا ہے۔
شمالی وزیرستان کا دشوار گزار پہاڑی علاقہ اور افغان سرحد سے قربت ان شدت پسند گروہوں کو ازسرنو منظم ہونے اور سرحد پار حملوں کی منصوبہ بندی کرنے کے لیے ایک محفوظ پناہ گاہ فراہم کرتا ہے جو کہ دیرپا امن کے قیام میں بڑی رکاوٹ بن چکا ہے۔
