سول ایوی ایشن اتھارٹی نے بڑے ایئر پورٹس پر جدید سسٹم متعارف کروا دیا

فیصل آباد: سول ایوی ایشن اتھارٹی نے ملک کے بڑے ایئر پورٹس پر مسافروں کی سہولت کے لیے جدید سسٹم متعارف کروا دیا۔ پہلے مرحلے میں فیصل آباد ایئر پورٹ پر خود کار چیک ان مشینیں نصب کردی گئیں۔

سول ایوی ایشن اتھارٹی نے اسلام آباد اور کراچی سمیت 5 بڑے ایئر پورٹس پر جدید سیلف چیک ان سسٹم نصب کرنا شروع کر دئیے۔

پہلے مرحلے میں فیصل آباد ایئر پورٹ پر خود کار چیک ان مشینیں نصب کردی گئیں جس کے بعد اب مسافر اپنی مدد آپ کے تحت اپنا بورڈنگ پاس حاصل کرسکیں گے۔

مزید پڑھیں : پی آئی اے کا بوئنگ 777 طیارہ بڑے حادثے سے بال بال بچ گیا

کراچی کے جناح انٹرنیشنل ایئر پورٹ سمیت بڑے ایئر پورٹس پر 15 سے زائد جدید مشینیں مسافروں کی سہولت کے لیے نصب کی جا رہی ہیں۔ یہ مشینیں فرانس سے درآمد کی گئی ہیں۔

کراچی ایئر پورٹ پر ڈومیسٹک اور انٹرنیشل لاؤنج میں 2، 2 مشینیں نصب کی گئی ہیں۔ جدید مشینوں کے نصب ہونے سے مسافر اپنا بورڈنگ پاس خود کار طریقہ سے حاصل کر سکیں گے۔

خود کار چیک ان سسٹم فیصل آباد ایئر پورٹ پر نصب کیے جانے کے بعد 3 مشینیں اسلام آباد ایئرپورٹ، 2 پشاور، 2 کوئٹہ اور 2 ملتان ایئر پورٹ پر نصب کی جائیں گی۔

سول ایوی ایشن نے تمام ایئر لائنز کو بھی ہدایت کی ہے کہ وہ بھی خود کار چیک ان سسٹم کو استعمال کرتے ہوئے اپنے اپنے نیٹ ورکس سے فوری منسلک کریں۔