وفاقی کابینہ کے اجلاس میں آرمی چیف کی مدت ملازمت میں توسیع کی منظوری

اسلام آباد: وفاقی کابینہ کے جلاس میں آرمی چیف جنرل قمر جاوید باجوہ کی مدت ملازمت میں توسیع کی منظوری دے دی گئی ہے۔

تفصیلات کے مطابق وزیراعظم عمران خان کی زیر صدارت وفاقی کابینہ کا خصوصی اجلاس ہوا جس میں آرمی چیف کی مدت ملازمت میں 3سال کی توسیع کی نئی سمری منظور کرلی گئی، وفاقی کابینہ کے تمام ارکان نے سمری متفقہ طور پر منظور کی۔

وفاقی کابینہ کے ہنگامی اجلاس میں قانونی ٹیم نے وزیراعظم عمران خان کو آرمی چیف کی مدت ملازمت میں توسیع کے نوٹیفکیشن کی معطلی سے متعلق بریفنگ دی،وفاقی کابینہ کے تمام ارکان نے سمری پر دستخط کیے جس کے بعد اسے منظوری کیلئے صدر مملکت ڈاکٹر عارف علوی کو ارسال کر دیا گیا ہے۔

بعد ازاں میڈیا کو بریفنگ دیتے ہوئے وفاقی وزیر شفقت محمود کا شیخ رشید اور معاون خصوصی شہزاد اکبر کے ہمراہ میڈیا کو بریفنگ دیتے ہوئے کہناتھا کہ اجلاس میں آرمی چیف کی دوبارہ تعیناتی سے متعلق سپریم کورٹ کے فیصلے کا جائزہ لیا گیا، آئین کے آرٹیکل 243 کے تحت وزیر اعظم کا یہ اختیار ہے کہ وہ صدر کو ایڈوائس کریں۔

شفقت محمودکاکہناتھا کہ وزیراعظم کی تجویز پر صدر کو آرمی چیف کی تقرری کا اختیار ہےاس طریقے پر عمل کرتے ہوئے صدر نے آرٹیکل 243 کے تحت آرمی چیف کی مدت ملازمت میں توسیع کی منظوری دی۔

شفقت محمود کا کہنا تھا کہ یہ وزیراعظم کا اختیار ہے کہ کیا ایکسٹنشن دینے کے حالات ہے یا نہیں؟ خطے کے اس وقت غیر معمولی حالات ہیں۔ بھارت دریاؤں کا پانی روکنے کی دھمکی دے رہا ہے۔ پہلی بار بھارت نے بالاکوٹ پر حملہ کرنے کی کوشش کی، بھارت کا یہ حملہ غیر معمولی صورتحال ہے۔

ان کا کہنا تھا کہ بھارت بار بار پاکستان کو دھمکیاں دے رہا ہے اور کوئی جھوٹا آپریشن کر سکتا ہے، مقبوضہ کشمیر میں 113 دن سے جاری کرفیو بھی غیر معمولی حالات ہیں ، سرحدوں پر غیر معمولی حالات کی وجہ سے آرمی چیف کی مدت ملازمت میں توسیع دی گئی۔

شفقت محمود نے کہا کہ وزیراعظم نے فیصلہ کیا ہماری آرمی کمانڈ میں تسلسل ہونا چاہئے، وزیراعظم نے جنرل قمر جاوید باجوہ کی مدت میں توسیع کی سمری بھیجی ہے، آرمی چیف نے ملکی سالمیت کے لیے بہتر کردار ادا کیا ہے،آپریشن ردالفساد میں آرمی چیف جنرل باجوہ کا بہت اہم کردار ہے۔