گوگل نیوز پر ہمیں فالو کریںسری لنکا کی نوجوان کرکٹ ٹیم کے خلاف ہوم سیریز کے لیے پاکستان انڈر 17 اسکواڈ کا باضابطہ اعلان کر دیا گیا ہے۔ قومی ٹیم کی کمان حال ہی میں شاندار کارکردگی دکھانے والے اذان احمد کے سپرد کی گئی ہے۔
پی سی بی کے مطابق سری لنکا انڈر 17 اور پاکستان کی نوجوان ٹیموں کے درمیان یہ سنسنی خیز سیریز 9 سے 24 اکتوبر تک ملتان میں کھیلی جائے گی۔ شیڈول کے مطابق مہمان ٹیم 5 اکتوبر کو پاکستان پہنچے گی۔ اس دورے میں دونوں ٹیموں کے درمیان ایک تین روزہ (تھری ڈے) میچ اور پانچ ایک روزہ (ون ڈے) مقابلے کھیلے جائیں گے۔
واضح رہے کہ نو منتخب کپتان اذان احمد کی ہی زیرِ قیادت راولپنڈی کی ٹیم نے رواں برس شاندار کھیل پیش کرتے ہوئے نیشنل انڈر 17 کپ کا ٹائٹل اپنے نام کیا تھا اور اب انہی سے قومی سطح پر بھی اسی کامیابی کو دہرانے کی توقع کی جا رہی ہے۔
پاکستان کا 16 رکنی اسکواڈ
اذان احمد (کپتان)، عبداللہ احمد بٹ، ارسلان حسن، داؤد توقیر رانا، فہد اقبال، حامد رضا، حمزہ عباس بلوچ، حسن علی، محمد عیسیٰ بلوچ، محمد احسان، محمد نوید، محمد صائم، محمد یعقوب خان، محمد یوسف، شیر ولی خان اور سدیس احمد۔
ریزرو کھلاڑی
سلیکشن کمیٹی نے ایمرجنسی صورتحال کے لیے 4 ریزرو کھلاڑیوں کا بھی انتخاب کیا ہے جن میں عمار خان، عماد علی شاہ، نفیس اختر اور ثاقب خان شامل ہیں۔
