شاعرِ مشرق علامہ محمد اقبال کا 144واں یومِ ولادت آج منایا جارہا ہے

اسلام آباد: ملک بھر میں آج قومی شاعر اور حکیم الامت علامہ محمد اقبال کا 144واں یومِ ولادت قومی جوش و جذبے سے منایا جارہا ہے جبکہ شاعرِ مشرق علامہ اقبال نے اپنی شاعری سے مسلمانوں میں جذبۂ آزادی بیدار کرنے کے ساتھ ساتھ اسلام کی درست فکر کی طرف رہنمائی کی۔

گزشتہ صدی کے بین الاقوامی شہرت یافتہ شاعر، دانشور، صوفی اور فلسفی علامہ محمد اقبال نے 9 نومبر 1877ء کو پنجاب کے شہر سیالکوٹ میں آنکھ کھولی جبکہ آپ نے فلسفے، عربی اور فارسی زبان پر عبور حاصل کرکے اپنے علم کو اسلام کی ترویج کیلئے استعمال کیا۔

یہ بھی پڑھیں:

کالعدم ٹی ٹی پی سیز فائر معاہدے پر آمادہ ہے، وزارتِ اطلاعات 

قومی سلامتی کمیٹی کااجلاس، عسکری قیادت کی بریفنگ پر ارکان پارلیمنٹ مطمئن

ایک صوفی اور شاعر کی حیثیت سے ڈاکٹر علامہ اقبال نے مسلمانوں کو ایمان کی پختگی کے ساتھ میدانِ عمل میں اترنے کی نصیحت کی، انگریز سامراج کی طرف سے مسلط غلامی کی زنجیریں توڑنے کیلئے عزم و حوصلے کو مہمیز عطا کی اور ایثار کا درس دیا۔

بطور فلسفی علامہ اقبال کی شاعری میں جو گہرائی اور گیرائی نظر آتی ہے، وہ آج تک کسی اور شاعر کو نصیب نہ ہوسکی، اردو شاعری میں علامہ اقبالؔ کے معیار اور مقدار کی شاعری کسی اور شاعر کے ہاں نہیں ملتی۔مرزا غالب کو غزل کا جبکہ اقبال کو نظم کا بے تاج بادشاہ سمجھا جاتا ہے۔

مسلمانوں کے علیحدہ ملک پاکستان کے قیام کیلئے علامہ اقبال کا فکر و فلسفہ اس اعتبار سے بھی بے حد اہمیت کا حامل ہے کہ آپ نے خطبۂ الٰہ آباد کے دوران مسلمانوں کیلئے الگ مملکت کا تصور پیش کیا اور مسلمانوں کی تحریکِ آزادی کو اپنی شاعری سے نئی قوت عطا کی۔

پاکستان سمیت دُنیا بھر میں جہاں جہاں اردو اور فارسی شاعری پڑھی اور سمجھی جاتی ہے، وہاں علامہ اقبال کو آج یاد کیا جارہا ہے اور اقبالّ شناس ان کے فکر و فلسفے پر مختلف تقاریب کا اہتمام کر رہے ہیں جن کے دوران شاعرِ مشرق کے فکر و فلسفے پر روشنی ڈالی جائے گی۔