علی حیدر گیلانی کی مبینہ ویڈیو کا معاملہ،پی ٹی آئی رہنما الیکشن کمیشن پہنچ گئے

اسلام آباد: سابق وزیر اعظم یوسف رضا گیلانی کے بیٹے علی حیدر گیلانی کی ووٹ ضائع کرنے کا طریقہ بتانے کی مبینہ ویڈیو کا معاملہ، پاکستان تحریک انصاف (پی ٹی آئی) ریفرنس دائر کرنے الیکشن کمیشن پہنچ گئی۔

پاکستان کے ایوان بالا (سینیٹ) کے انتخابات میں پاکستان ڈیموکریٹک موومنٹ کے اسلام آباد سے امیدوار یوسف رضا گیلانی کے بیٹے علی حیدر گیلانی کی ووٹ ضائع کرنے کا طریقہ بتانے کی مبینہ ویڈیو منظرعام پر آئی ہے۔

ویڈیو میں علی حیدر گیلانی مبینہ طور پر ایک رکن کو ووٹ ضائع کرنے کا طریقہ بتا رہے ہیں جبکہ یہ واضح بھی نہیں کہ ویڈیو میں موجود افراد کون ہیں۔

اس ویڈیو کے منظر عام پر آنے کے بعد تحریک انصاف الیکشن کمیشن آف پاکستان پہنچ گئی تاہم الیکشن کمیشن دفتری اوقات ختم ہونے کے باعث بند تھا۔

اس موقع پر میڈیا سے گفتگو کرتے ہوئے وفاقی وزیر سائنس و ٹیکنالوجی فواد چوہدری کا کہنا تھاکہ الیکشن کمیشن آئے ہیں لیکن یہاں اس وقت کوئی موجود نہیں، صبح ریفرنس دائر کریں گے۔

ان کا کہنا تھاکہ علی حیدر گیلانی نے ویڈیو کو تسلیم کیا ہے، اس اقبال جرم کے بعد یوسف رضا گیلانی کو الیکشن لڑنے سے نااہل قرار دیا جائے۔

وفاقی وزیر کا کہنا تھاکہ یوسف رضا گیلانی کا الیکشن کوئی الیکشن نہیں کیونکہ حفیظ شیخ ان سے ووٹوں میں بھی آگے ہیں۔

یہ بھی پڑھیں:  ووٹ مانگ رہا تھا،علی حیدر گیلانی نے ویڈیو کی تصدیق کر دی

ان کا کہنا تھاکہ ملک میں کہرام مچا ہے اور الیکشن کمیشن میں فوری معاملات دیکھنے کیلئے کوئی نہیں، ہمارے پاس نہ کوئی نام ہے اور نہ ہی وڈیو سے پتہ چل رہاہے کہ کون ہے۔

خیال رہے کہ علی حیدر گیلانی کا اپنی ووٹ ضائع کرنے سے متعلق ویڈیو پر موقف سامنے آیا ہے جس کے مطابق  ہم سے تحریک انصاف کے کچھ ارکان اسمبلی نے رابطہ کیا تھا ، جن کا کہنا تھا کہ وہ حفیظ شیخ کے بجائے یوسف رضا گیلانی کو ووٹ دینا چاہتے ہیں۔