میانوالی: وزیر اعظم عمران خان نے کہا ہے کہ تھانہ کچہری اور پٹواری کی سیاست نے ہمیں نقصان پہنچایا ، پولیس اچھا کام کرے گی تو ملک کی تقدیر بدل جائے گی۔
میانوالی سٹی پولیس اسٹیشن میں پولیس افسران سے خطاب کرتے ہوئے وزیر اعظم عمران خان نے کہا کہ ماڈل پولیس اسٹیشن کا قیام عوامی فلاح و بہبود کے لیے اہم ہے، پولیس اچھا کام کرے گی تو ملک کی تقدیر بدل جائے گی جبکہ پولیس عوام کو امن و تحفظ کا احساس دے۔
انہوں نے کہا کہ پہلی بار جب رکن اسمبلی بنا تو سب سے بڑا مسئلہ تھانہ کچہری تھا، سیاستدان تھانے کچہری کو اپنے کنٹرول میں رکھتے تھے ، یہ ماڈل پولیس اسٹیشن پولیس میں تبدیلی کا آغاز ہے۔
قبل ازیں وزیرِ اعظم عمران خان نے میانوالی میں ماڈل پولیس اسٹیشن کا افتتاح کیا۔پولیس اسٹیشن آمد پر وزیر اعظم کو پنجاب پولیس کے دستے کی جانب سے گارڈ آف آنر پیش کیا گیا۔
بعد ازاں وزیر اعظم نے پولیس اسٹیشن کے مختلف حصوں کا دورہ کیا، اس موقع پر آئی جی پنجاب نے پولیس محکمے کے حوالے سے وزیر اعظم کو تفصیلی بریفنگ دی۔
وزیر اعلیٰ پنجاب سردار عثمان بزدار، آئی جی پنجاب اور دیگر اعلیٰ حکام بھی وزیر اعظم کے ہمراہ تھے۔
مزید پڑھیں:خیبرپختونخوا حکومت نے میٹرک پاس اکبر ایوب کو وزارت تعلیم کا قلمدان سونپ دیا