گوگل نیوز پر ہمیں فالو کریںصوبہ پنجاب کے وزیر اعلیٰ عثمان بزدار نے کہا ہے کہ پاکستان کو پولیو سے پاک کرنے کی جنگ ہم سب نے مل کر لڑنی ہے تاکہ ہماری آئندہ نسلوں میں کوئی پولیو سے متاثر نہ ہو۔
سماجی رابطے کی ویب سائٹ ٹوئٹر پر اپنے پیغام میں وزیر اعلیٰ پنجاب عثمان بزدار نے کہا کہ پولیو کے خلاف اس لیے جنگ کر رہے ہیں تاکہ آنے والی نسلیں پولیو وائرس کا شکار نہ ہوں۔
وزیر اعلیٰ عثمان بزدار نے کہا کہ کل سے پنجاب بھر میں پولیو مہم شروع ہو رہی ہے جس میں ہمارے تمام وزراء، اراکینِ پارلیمنٹ اور سول سوسائٹی کے افراد پولیو ٹیمز کے شانہ بشانہ حصہ لیں گے۔
پاکستان کو پولیو سے پاک کرنے کی جنگ ہم سب نے مل کر لڑنی ہے تاکہ ہماری آنے والی نسلوں میں کوئی بچہ اس وائرس کا شکار نہ ہو
کل سےپنجاب بھر میں پولیو مہم شروع ہو رہی ہے جس میں ہمارےتمام وزراء، پارلیمنٹرینز اور سول سوسائٹی کے افراد پولیو ٹیموں کے شانہ بشانہ حصہ لیں گے#PakFightsPolio https://t.co/IivnHOEb6E
— Usman Buzdar (@UsmanAKBuzdar) December 15, 2019
وزیر اعلیٰ نے حکومتِ پنجاب کی طرف سے نامور عالمِ دین مولانا طارق جمیل کا پیغام بھی شیئر کیا جس میں کہا گیا ہے کہ پولیو ویکسین کے بارے میں پایا جانے والا ابہام غلط ہے۔
مشہور و معروف عالمِ دین مولانا طارق جمیل نے شیئر کیے گئے پیغام میں کہا ہے کہ پولیو ویکسین کو سازش سمجھنا غلط ہے۔ یہ ایک دوا ہے جسے اللہ نے شفاء کا سبب بنایا ہے۔ اپنے بچوں کو پولیو کے قطرے ضرور پلوائیں۔
یاد رہے کہ اس سے قبل وزیراعظم کے معاونِ خصوصی برائے صحت ڈاکٹر ظفر مرزا نے اعلان کیا کہ پولیو کے خلاف 3 روزہ ملک گیر مہم کا آغاز کل سے کیا جائے گا، تمام والدین بچوں کو پولیو کے قطرے پلوائیں۔
ٹوئٹر پر اپنے پیغام میں ڈاکٹر ظفر مرزا نے کہا کہ پولیو مہم کے دوران 5 سال سے کم عمر تمام بچوں کو پولیو ویکسین کے قطرے پلائے جائیں گے۔
مزید پڑھیں: پولیو کے خلاف 3 روزہ ملک گیر مہم کا آغاز کل سے کیا جائے گا۔ڈاکٹر ظفر مرزا
