چین نے ایف اے ٹی ایف میں پاکستان کی بھر پور حمایت کااعلان کردیا

ترجمان چینی وزارت خارجہ نے کہا ہے کہ چین ایف اے ٹی ایف میں پاکستان کابھرپورساتھ دے گا، ایف اے ٹی ایف نے دہشتگرد فنانسنگ پر پاکستانی اقدامات کو تسلیم کیا ہے۔

ترجمان چینی وزارت خارجہ نے میڈیا کو بریفنگ دیتے ہوئے کہا کہ ایف اے ٹی ایف نے پاکستان کی ریٹنگ میں کوئی تبدیلی نہیں کی بلکہ دہشت گردوں کی فنانسنگ روکنےکےلئے پاکستانی اقدامات کوتسلیم کیا، پاکستان کی ریٹنگ تبدیل نہ کرنا پاکستان کی کوششوں کی حوصلہ افزائی ہے۔

انہوں نے کہا کہ چین ایف اے ٹی ایف کے اراکین کے ساتھ مل کر پاکستان کی مدد اور تعمیری تعاون کیلئے کام جاری رکھے گا،  چین انسداددہشتگردی فنانسنگ سسٹم کی مزید بہتری کیلیےپاکستان کی کوششوں کی حمایت کرتاہے۔

ترجمان نے مزید کہا کہ چین اورایف اے ٹی ایف مشترکہ طور پر پاکستان کومزیدتعاون اورمدد فراہم کریں گے اور تعمیری تعاون کے حوالے سے کام جاری رکھیں گے ، ایف اے ٹی ایف کا کام کسی ملک پر پابندیاں عائد کرنا اور سزا دینا نہیں ہے، ایف اے ٹی ایف کا مقصد ہے وہ ایسی کوششوں کی حوصلہ افزائی کرے۔

یاد رہے گزشتہ ماہ فرانس کے دارالحکومت پیرس میں فنانشل ایکشن ٹاسک فورس کے اجلاس میں ایف اے ٹی ایف کے صدر کا کہنا تھا کہ پاکستان نے اپنی کارکردگی بہتر کی ہے، فی الحال پاکستان کا نام فروری دو ہزاربیس تک گرے لسٹ میں ہی رہے گا۔