موسمیاتی تبدیلی کانفرنس بے نتیجہ

گلاسگو میں منعقد ہونے والی کوپ 26موسمیاتی تبدیلی کانفرنس میں معاہدہ بھارت کی وجہ سے تقریباً خطرے میں پڑ گیا۔ تقریباً 200 ممالک نے موسمیاتی بحران سے بچنے کے لیے ایک معاہدے پر دستخط کرنے پر اتفاق کیا لیکن یہ معاہدہ گلوبل وارمنگ سے نمٹنے کے لیے کافی حد تک کامیاب نہیں ہوا اور اسے مایوسی قرار دیا گیا۔

آخری لمحات میں کوئلے پر انحصار کرنے والے ممالک کے حمایت یافتہ بھارت نے بین الاقوامی معاہدے پر اعتراضات اٹھائے جس کی شق میں جلد بازی میں ترمیم کردی گئی تاکہ ترقی یافتہ ممالک کوئلے سے بجلی یپدا کرنے کے طریقہ کار میں تبدیلی لائیں۔بھارت کے وزیر ماحولیات و آب و ہوا بھوپیندر یادو کا کہنا تھا کہ ابھرتی ہوئی معیشتوں کے قومی حالات کی عکاسی کرنے کیلئے معاہدے پر نظر ثانی کی ضرورت ہے۔ تیل یا قدرتی گیس کے استعمال کو مرحلہ وار ختم کرنے سے متعلق کوئی مطالبہ نہیں کیا گیا۔

بہت سے ممالک، بشمول چھوٹے جزیرے والے ملک جو موسمیاتی تبدیلیوں کے لیے سب سے زیادہ خطرے سے دوچار ہیں، نے کہا کہ وہ سخت مایوس ہیں۔ اس سربراہی اجلاس کی صدارت کرنے والے برطانوی عہدیدار آلوک شرما نے اس سربراہی اجلاس کے سامنے آنے پر مایوسی کا اظہار کیا۔ اقوام متحدہ کے سربراہ نے اس معاہدے کو ایک اہم قدم قرار دیا لیکن کہا کہ یہ کافی نہیں ہے۔ انہوں نے کہا کہ یہ افسوسناک ہے کہ ممالک کسی معاہدے تک نہیں پہنچ سکے، حتیٰ کہ آنے والی نسلوں کی زندگیاں خطرے میں پڑ گئی ہیں۔

ہندوستان جیسے ممالک نے اس بات کو برقرار رکھا کہ کوئلے کو موسمیاتی معاہدے میں شامل کیا گیا تھا۔ سچ یہ ہے کہ بھارت اس کے خلاف بڑھتی ہوئی مخالفت کے باوجود کوئلے پر بہت زیادہ انحصار کرتا ہے۔ یہ بجلی کی پیداوار، صنعتی طاقت کے لیے ایندھن کا سب سے بڑا ذریعہ ہے اور ترقی پذیر ممالک کے لاکھوں لوگ اب بھی اس پر انحصار کرتے ہیں۔ ہندوستان میں بجلی کی طلب میں اگلی دو دہائیوں میں دنیا کے کسی بھی حصے سے زیادہ تیزی سے بڑھنے کی امید ہے اور اس طرح ترقی پذیر ممالک کے لیے کوئلے کو مکمل طور پر چھوڑنا مشکل ہے۔

توقعات پر پورا نہ اترنے کے علاوہ، اس معاہدے میں ترقی پذیر ممالک سے مزید وعدے بھی کئے گئے،لیکن اس بات کی کوئی ضمانت نہیں دی گئی کہ آخرکار انہیں مزید مالی امداد ملے گی۔ امریکہ اور یورپی یونین کی طرف سے مزاحمت کے بعد، معاہدے نے ترقی پذیر دنیا میں موسمیاتی تبدیلیوں کو پہنچنے والے نقصان کے لیے مالیاتی سہولت کے حوالے سے کوئی حوالہ چھوڑ دیا ہے۔ امیر ممالک نے ایک دہائی قبل 100 بلین ڈالر کا وعدہ کیا تھا لیکن وہ فراہم کرنے میں ناکام رہے ہیں۔

دنیا بھر کی حکومتوں کی ذمہ داری ہے کہ وہ اس بات کو یقینی بنائیں کہ موسمیاتی معاہدے کی پابندی ہو اور وعدے پورے ہوں۔ حقیقی کام جاری رہے گا اور اقوام عالم کو دنیا کے پائیدار مستقبل کے لیے سخت آب و ہوا کے وعدے پورے کرنے چاہئیں۔