گوگل نیوز پر ہمیں فالو کریںلاہور: پاکستان مسلم لیگ (ن) کی سینئر نائب صدر مریم نواز نے کہا ہے کہ ان کی پارٹی انتخابات سے خوفزدہ نہیں ہے اور جب پنجاب میں انتخابات ہوں گے تو وہ اکثریتی نشستیں حاصل کرے گی۔
لاہور میں مسلم لیگ ن کے کارکنوں سے خطاب کرتے ہوئے پارٹی کی سینئر رہنما نے کہا کہ نواز شریف جلد ان کے درمیان ہوں گے۔
ان لوگوں نے نواز شریف کو بار بار حکومت سے نکالا۔ آپ نواز شریف کو تین بار اقتدار میں لائے لیکن ان لوگوں نے ان کی حکومتیں گرا دیں۔
مسلم لیگ (ن) کی رہنما نے پاناما لیکس کیس میں 28 جولائی 2017 کو نواز شریف کی برطرفی کو ایک ”قومی سانحہ” قرار دیتے ہوئے مزید کہا کہ اس کے بعد سے پاکستان ٹھیک نہیں ہوا۔
مریم نواز نے اس عزم کا اظہار کیا کہ وہ اس وقت تک آرام سے نہیں بیٹھیں گی جب تک کہ ان کی پارٹی قوم کی تقدیر نہیں بدلتی اور ملک کو معاشی اور سیاسی دونوں طرح سے جاری بحران سے نہیں نکالتیں۔
مسلم لیگ (ن) کی سینئر نائب صدر نے کہا کہ ”نواز شریف کے خلاف سازش کرنے والے تمام کرداروں کو اپنے اعمال کی قیمت چکانی پڑے گی۔”
مریم نواز نے نواز شریف، مسلم لیگ (ن) کے صدر اور وزیر اعظم شہباز شریف اور پارٹی کارکنوں کا ان کی قیادت پر اعتماد ظاہر کرنے اور انہیں نئی ذمہ داریاں سونپنے پر شکریہ ادا کیا۔
مریم، جنہیں اس ماہ کے شروع میں پارٹی کی چیف آرگنائزر مقرر کیا گیا تھا، اپنی پرواز میں تھوڑی تاخیر کے بعد سہ پہر ساڑھے تین بجے ابوظہبی سے علامہ اقبال انٹرنیشنل ایئرپورٹ پر اتریں۔
ایون فیلڈ ریفرنس کیس میں بری ہونے کے بعد مسلم لیگ (ن) کے قائد نواز شریف کی صاحبزادی اکتوبر سے اپنے والد کے ساتھ وقت گزارنے کے لیے لندن میں تھیں۔
مزید پڑھیں:آئین اور قانون کو روند کر ملک کو بنانا ری پبلک بنادیا گیا ہے، عمران خان
مسلم لیگ ن کے قائد نواز شریف نے مریم نواز سے کہا ہے کہ وہ پنجاب میں آئندہ انتخابات سے قبل وزیر داخلہ رانا ثناء اللہ کے ساتھ ریلیوں اور جلسوں کی قیادت کریں۔ نئے تعینات ہونے والے چیف آرگنائزر کو پارٹی سیٹ اپ کی ”تنظیم نو“ کرنے کا کام بھی سونپا گیا ہے۔
