بھارتی وزیر خارجہ کا مسئلہ کشمیر اٹھانے والی امریکی رکن کانگریس سے ملنے سے انکار

نئی دہلی: بھارتی وزیر خارجہ ڈاکٹر سبرامنیم جے شنکر نے بھارتی نژاد امریکی رکن کانگریس پرمیلا جے پال سے اپنی مقررہ ملاقات منسوخ کردی۔ پرمیلا جے پال نے ایوان نمائندگان میں مسئلہ کشمیر کے حوالے سے ایک قرار داد پیش کی تھی۔

بھارتی ٹی وی کے مطابق بھارتی وزیر خارجہ ڈاکٹرسبرامنیم جے شنکر ان دنوں بھارت امریکا ٹو پلس ٹو فورم کی سالانہ میٹنگ میں شرکت کے لیے واشنگٹن میں موجود ہیں۔ جہاں امریکی کانگریس کے ایک وفد کے ساتھ ان کی ملاقات طے تھی۔

لیکن بتایا جاتا ہے کہ انہوں نے اچانک یہ ملاقات اس لیے منسوخ کردی کیونکہ بھارتی نڑاد رکن کانگریس پرمیلا جے پال بھی اس وفد میں شامل تھیں، جنہوں نے کشمیر میں بھارتی حکومت کے اقدامات کی نکتہ چینی کی ہے۔

وزیر خارجہ جے شنکر نے کہاکہ مجھے ان(پرمیلا جے پال) سے ملاقات کرنے میں کوئی دلچسپی نہیں۔ مجھے نہیں لگتا کہ ان کی رپورٹ میں جموں و کشمیر کی صورت حال کو مناسب طریقے سے سمجھا گیا ہے یا اس میں بھارت سرکار کے اقدامات کو درست طریقے سے بتایا گیا۔

یہ بھی پڑھیں: امریکانےتقریباً2سال بعد پاکستان کےلیے فوجی تربیت کا پروگرام بحال کر دیا

مجھے صرف ایسے لوگوں سے بات کرنے میں دلچسپی ہے جو معروضی انداز میں سوچتے ہیں اور کھلے ذہن سے بات چیت کرتے ہیں لیکن ایسے لوگوں سے بات چیت نہیں کرنا چاہتا جنہوں نے پہلے سے اپنا ایک ذہن بنارکھا ہے۔

پرمیلا جے پال نے بھارتی وزیر خارجہ کے اس اقدام پر سخت افسوس اور مایوسی کا اظہار کرتے ہوئے ایک ٹوئٹ کیا کہ اس میٹنگ کی منسوخی انتہائی افسوس ناک ہے۔ اس فیصلے سے اس یقین کو ہی مزید تقویت ملتی ہے کہ بھارتی حکومت کسی بھی طرح کے اختلاف رائے کو سننے کی متحمل نہیں ہے۔