عمران خان کے ہوتے پاکستان کو کسی اور دشمن کی ضرورت نہیں، احسن اقبال

لاہور:پاکستان مسلم لیگ (ن) کے سیکریٹری جنرل احسن اقبال نے کہا ہے کہ عمران خان کے ہوتے پاکستان کو کسی اور دشمن کی ضرورت نہیں، عمران خان کی آخری اننگز چل رہی ہے کیونکہ ان کا جانا ٹھہر گیا ہے ،پی ڈی ایم کی جماعتیں یکسو ہیں ،پیپلزپارٹی نے سرکاری جماعت سے اتحاد کر کے گھاٹے کا سودا کیا ہے۔

حکومت مسلم لیگ (ن)کی قیادت کیخلاف جھوٹے مقدمات میں سیاسی انتقام کو جاری رکھے ہوئے ہے جو افسوس کی بات ہے ،حکومت تین سال بعد بھی وزیر خزانہ تلاش کر رہی ہے جو ملکی سالمیت کیخلاف اقدام ہے ،موجودہ حکمرانوںکے پاس ’’میں‘‘کے علاوہ کچھ نہیں ہے اور اس خود پسندی نے ملک کو تباہ کر دیا ہے ۔

احتساب عدالت کے باہر میڈیا سے گفتگو کرتے ہوئے انہوں نے کہا کہ ہمارے دور میں ملک مسلسل ترقی کرتا رہا لیکن آج ترقی انتہائی حد تک گر چکی ہے ،پاکستان کو آج کسی دشمن کی ضرورت نہیں ہے کیونکہ عمران نیازی نے ملک کو وہ نقصان پہنچایا ہے جو دشمن اربوں ڈالر خرچ کر کے بھی نہیںکر سکتا ، اس حکومت کو مزید برداشت کرنا ممکن ہے۔

حکومت کی ناقص معاشی پالیسیوں کی وجہ سے غریب شخص بجلی کے بل ادا کرنے سے قاصر ہیں ،لوگوں کیلئے اشیائے خوردونوش ان کی پہنچ سے دور کر دی گئی ہیں ،شوگر و آٹا مافیا کیخلاف کارروائی کا ناٹک کیا جاتا ہے لیکن نیب کہاں ہیں، اربوں روپے کے غبن کی تحقیقات ہو جانے کے بعد بھی کس کو گرفتار کیا گیا ؟۔

انہوں نے کہا کہ نواز شریف قومی مفاد کو مدنظر رکھتے ہوئے بھارت سے تعلقات کی بات کرتے تھے تو ان کیخلاف نعرے لگائے جاتے تھے ،آج مجاہد ملت مفتی عمران خان صاحب اس بات کا جواب دیں کہ ہواؤں کا رخ کیسے بدل گیا ہے،کیا بھارت نے مقبوضہ کشمیر کی متنازعہ حیثیت واپس کر دی ہے؟، بھارت سے تجارت شروع کرنے کے پیچھے کیا ہے، یہ قومی مفاد کا سودا کرنے پر آئے ہوئے ہیں ۔

ملک بچانے کا ایک ہی طریقہ ہے کہ صاف و شفاف انتخابات ہوں۔ انہوں نے کہا کہ مسلم لیگ (ن) کے پاس معاشی پروگرام، معاشی تجربہ اور معاشی ٹیم بھی ہے ،آج ہر کوئی مسلم لیگ (ن)کے منصوبوں سے فائدہ اٹھا رہا ہے۔ انہوں نے کہا کہ یہ حکومت کورونا ویکسین کی حفاظت نہیں کر سکی، کہیں اسے ضائع تو کہیں اسے خرد برد کر کے وی آئی پیز کو لگا دیا گیا ہے۔

مزید پڑھیں:پی ٹی آئی دورِ حکومت میں بڑی مینوفیکچرنگ کمپنیوں کی شرحِ نمو میں اضافہ ہوا۔ گورنر سندھ

یہ کورونا، معیشت، خارجہ امور سمیت کسی چیز کو بھی مینج نہیں کر سکے ،عمران خان کی آخری اننگز چل رہی ہے کیونکہ ان کا جانا ٹھہر گیا ہے۔ انہوں نے کہا کہ پی ڈی ایم کی جماعتیں یکسو ہیں ،پیپلزپارٹی نے سرکاری جماعت سے اتحاد کر کے گھاٹے کا سودا کیا ہے۔

ہماری جدوجہد صرف عمران خان کو نکالنا نہیں بلکہ 73 سال سے جاری میوزیکل چیئر کے کھیل سے نکال کر ملک کو دوبارہ پاؤں پر کھڑا کرنا ہے ۔ انہوں نے کہا کہ آج سی پیک کو تباہ کر دیا گیا ہے، اگر ہماری حکومت رہتی تو آج سی پیک کو پورٹ فولیو 100 ارب ڈالر پر پہنچ چکا ہوتا۔