گوگل نیوز پر ہمیں فالو کریںکچے آم یعنی کے کیری آج کل مارکیٹ میں ہر جگہ پر دستیاب ہیں، ہمارے اردگرد موجود لوگوں کی اکثریت انھیں چٹنی میں تو استعمال کرتی ہے لیکن اس کے فائدے نہیں جانتی۔
آپ کو شاید یہ جان کر حیرانی ہوگی کہ کچے آم صحت کیلئے بہت زیادہ مفید ہوتے ہیں، خاص طور پر ایسے علاقوں میں جو کہ گرم رہتے ہیں۔ آئیے اس کے فائدے جانتے ہیں:
شدید گرمی اور ڈی ہائیڈریشن سے تحفظ
کچے آموں کا جوس پینا صرف فرحت بخش ہی نہیں بلکہ یہ شدید گرمی کے اثرات کو کم کرکے ڈی ہائیڈریشن کی روک تھام کرتا ہے۔ گرمیوں میں پسینے کی شکل میں بہت زیادہ سوڈیم کلورائیڈ اور آئرن خارج ہوسکتا ہے، جس سے جسم ڈی ہائیڈریشن کا شکار ہوتا ہے، کیری کا شربت اس سے بچانے میں مدد دیتا ہے۔
معدے کے مسائل کا حل
کچے آم کا استعمال معدے کے عوارض سے بچاؤ میں مدد دیتا ہے، جو موسم گرما میں کافی عام ہوجاتے ہیں۔ کیری کھانے کی عادت قبض، ہیضے، سینے کی جلن اور متلی کی کیفیت اور بدہضمی سے تحفظ یا ان کا اچھا علاج ثابت ہوتی ہے۔
دل کیلئے فائدہ مند
کچے آموں میں نیاسن نامی ایسڈ ہوتا ہے جو کہ دل کے لیے صحت بخش جز ہے، نیاسن خون کی شریانوں کے مسائل سے جڑے امراض کا خطرہ کم کرتا ہے جبکہ بلڈ کولیسٹرول لیول بہتر کرتا ہے۔
گوشت خورے (مسوڑوں کے امراض) کا علاج کرے
کیری کا سفوف یا آمچور کو گوشت خورے کا موثر علاج سمجھا جاتا ہے، اس مرض میں اکثر مسوڑوں سے خون، خراشیں، کمزوری اور تھکاوٹ وغیرہ کا سامنا ہوتا ہے۔ کچے آم وٹامن سی سے بھرپور ہوتے ہیں اور عام طور پر اس کی کمی ہی اس مرض کا باعث بنتی ہے۔ اسی طرح یہ وٹامن خون کی شریانوں کی لچک بڑھاتا ہے اور خون کے سرخ خلیات کو بڑھاتا ہے جس سے اینیما کا مسئلہ بھی کم ہوتا ہے۔
جگر اور آنتوں کیلئے فائدہ مند
کچے آم جگر کے لیے بہت فائدہ مند ہیں اور یہ جگر کے مختلف امراض سے بچانے یا علاج میں مددگار ثابت ہوسکتے ہیں۔ کیری کے ٹکڑوں کو چبانا چھوٹی آنت میں پتے میں بننے والے سیال بائل کو داخل کرتا ہے، جہاں وہ چربی کو جذب کرنے کی صلاحیت بڑھاتا ہے جبکہ غذا میں موجود نقصان دہ جراثیموں کو مارتا ہے۔
جسمانی توانائی بڑھائے
معمولی مقدار میں کیری کا سفوف دوپہر کے وقت کی سستی کو دور کرنے کے لیے کافی ثابت ہوتا ہے جو عام طور پر کھانے کے بعد طاری ہوتی ہے۔ درحقیقت کچے آم جسمانی توانائی بڑھاتے ہیں اور کارکردگی بہتر بنانے میں مدد دیتے ہیں۔
نوٹ: واضح رہے کہ جن لوگوں کو کسی بھی قسم کے صحت کے مسائل درپیش ہیں وہ کیری کو کھانے سے پہلے اپنے معالج سے رابطہ کرلیں۔
