ہماری حکومت آئی تو چیف جسٹس کے ہاتھ میں قرآن کریم تھمائیں گے، سراج الحق

گوجرانوالہ: امیر جماعت اسلامی سراج الحق نے کہا ہے کہ اگر ہماری حکومت آئی تو چیف جسٹس کے ہاتھ میں قرآن کریم تھمائیں گے۔

گوجرانوالہ کے نجی میرج ہال میں تقریب سے خطاب کرتے ہوئے امیر جماعت اسلامی سراج الحق نے کہا کہ ہم ایسا پاکستان چاہتے ہیں جہاں افراد اور خاندانوں کی بجائے قانون کی حکمرانی ہو، نظام تب تبدیل ہوگا جب لوگوں کے رویے اور اخلاق تبدیل ہوں گے۔

امیر جماعت اسلامی کا کہنا تھا کہ ہم عدالتی نظام کو تبدیل کرنا چاہتے ہیں ہمارا عدالتی نظام یکسر مختلف ہوگا، ہماری حکومت آئی تو چیف جسٹس کے ہاتھ میں قرآن کریم تھمائیں گے، تمام مساجد کو تعلیمی اداروں میں تبدیل اور بنجر زمینوں کو سرسبزوشاداب کریں گے، عوام کا پیسہ جو سکیورٹی اور پروٹوکول پر خرچ ہو رہا ہے ہم اس کلچر کا خاتمہ کریں گے۔

یہ بھی پڑھیں:

پیپلز پارٹی جمہوری جماعت، ہم الیکشن کیلئے تیار ہیں۔بلاول بھٹو زرداری

انہوں نے مزید کہا کہ ہم اس ملک کی معیشت کو بہتر بناسکتے ہیں لیکن کوئی اور بہتر نہیں کرسکتا، جرنیلوں اور دیگر پارٹیوں کو کتنے مواقع ملے لیکن سب نے انٹرنیشنل مانیٹری فنڈ ( آئی ایم ایف ) کے دروازے پر دستک دی، اسد عمر، شوکت ترین، حفیظ شیخ، اسحاق ڈار سب نے آئی ایم ایف کا دروازہ کھٹکھٹایا ، ہم اصل قرض واپس کریں گے اور سود سے معافی مانگیں گے۔