وزیر خارجہ بلاول بھٹو کی ملکہ میکسما سے ملاقات

ڈیووس: وزیر خارجہ بلاول بھٹو زرداری نے ڈیووس میں ورلڈ اکنامک فورم کے سالانہ اجلاس کے موقع پر نیدرلینڈ کی ملکہ میکسما سے ملاقات کی۔

اجلاس کے موقع پر وزیر خارجہ نے ملکہ میکسما سے ملاقات ان کی اقوام متحدہ سیکرٹری جنرل کی خصوصی ایڈوکیٹ برائے انکلوسیو فنانس فار ڈیویلپمنٹ کی حیثیت میں کی۔

وزیر خارجہ بلاول بھٹو زرداری نے فنانشل انکلوین کے فروغ کے لیے پاکستانی حکومت کے عزم کی تجدید کی جبکہ وزیر خارجہ نے معیثت میں خواتین کی شمولیت میں سہولت کاری کے لئے حکومت پاکستان کے عزم کی بھی تجدید کی۔

یہ بھی پڑھیں: پی ٹی آئی مخالف کریک ڈاؤن کیخلاف درخواست کی سماعت آج ہوگی

وزیر خارجہ کے ساتھ وزیر مملکت حنا ربانی کھر بھی موجود تھیں۔ انہوں نے اس بات پر زور دیا کہ حکومت پاکستان ملک میں مالی شمولیت کے فروغ کے لیے پوری طرح پرعزم ہے۔

وزیر خارجہ بلاول بھٹو زرداری نے بیرون ملک میں مقیم پاکستانیوں کیلئے ملک میں بینکنگ کے نظام کو بہتر بنانے کے لیے روشن ڈیجیٹل اکاؤنٹ کے اقدام کے ذریعے پاکستان کی کوششوں پر بھی روشنی ڈالی۔

دوسری جانب وزیر خارجہ بلاول بھٹو زرداری نے رومانیہ کے وزیر خارجہ بوگڈان اوریسکو سے بھی الگ ملاقات کی اور باہمی تعاون کے شعبوں بشمول تجارت و سرمایہ کاری، ترقی اور تعلیم پر تبادلہ خیال کیا۔

اس ملاقات میں وزیر خارجہ نے اس بات پر زور دیا کہ پاکستان رومانیہ کے ساتھ دوطرفہ اور یورپی یونین کے تناظر میں اپنے تعلقات کو بہت اہمیت دیتا ہے۔ دونوں وزراء نے باہمی دلچسپی کے علاقائی اور بین الاقوامی امور پر بھی تبادلہ خیال کیا۔

مزید برآں وزیر خارجہ بلاول بھٹوزرداری نے فن لینڈ کے ہم منصب پیکا ہاوس سے بھی ملاقات کی اور دو طرفہ تعلقات کی صورتحال کے ساتھ ساتھ علاقائی اور عالمی امور پر تبادلہ خیال کیا۔

فن لینڈ کے ہم منصب سے ملاقات کے دوران وزیر خارجہ نے پاکستان کے سیاسی اور اقتصادی تعلقات کو مزید مستحکم کرنے کے عزم کا اظہار کیا۔ انہوں نے خاص طور پر تجارتی تعلقات اور سرمایہ کاری میں تعاون بڑھانے کی ضرورت پر زور دیا۔

بلاول بھٹو نے اس ملاقات میں امید ظاہر کی کہ اسلام آباد میں فن لینڈ کا سفارت خانہ دوبارہ کھول دیا جائے گا جس سے تجارتی تعلقات کو آسان بنانے کے ساتھ عوام سے رابطوں کو فروغ ملے گا بعدازاں دونوں وزرائے خارجہ نے رابطے میں رہنے اور پاک فن لینڈ تعلقات کے فروغ کے لیے مل کر کام کرنے پر اتفاق کیا۔