عراق میں امریکی فوج کی بمباری، 41 ایرانی ، 25 عراقی ملیشیا کے جنگجو ہلاک

بغداد: عراق اور شام میں امریکی فوج نے ایرانی حمایت یافتہ دہشت گردوں کے ٹھکانوں پر بڑے پیمانے پربمباری کی ہے جس کے نتیجے میں41 ایرانی جنگجو اور الحشد ملیشیا کے 25 عناصر کو موت کے گھاٹ اتار دیا گیا۔

میڈیارپورٹس کے مطابق امریکی محکمہ دفاع پینٹا گان کی طرف سے جاری کردہ ایک بیان میں کہاگیاکہ عراق میں الانبار شہر میں عراقی حزب اللہ کے ٹھکانوں پر بمباری کی گئی۔عراق میں کتائب خزعلی کے سربراہ ابو خزعلی کو نشانہ بنایا گیا جس کے نتیجے میں وہ ہلاک ہوگیا۔

امریکا کی طرف سے یہ کارروائی چند روز قبل کرکوک شہرمیں امریکی فوجی اڈے پراکٹ حملے اور اس کے نتیجے میں ایک امریکی ٹھیکیدار کی ہلاکت کے جواب میں کی گئی ہے۔ عراق میں عراقی حزب اللہ کے کم سے کم پانچ ٹھکانوں کو نشانہ بنایا گیا۔

یہ بھی پڑھیں: صومالیہ میں خودکش کاربم دھماکے میں ہلاکتوں کی تعداد 100سے تجاوزکرگئی

ان میں سے تین ٹھکانوں پرعراق اور دو کو شام میں نشانہ بنایا گیا۔ بمباری کے لیے امریکی ایف 15 طیاروں کا استعمال کیا گیا۔ابتدائی نتائج میں عراقی حزب اللہ کے ٹھکانوں کو نشانہ بنانے کے نتیجے میں کم سے کم 10 جنگجو ہلاک اور 14 زخمی ہوئے ۔

امریکی فوج کے ایک بیان میں کہا گیا کہ عراقی حزب اللہ کی نشانہ بننے والی پانچ تنصیبات میں اسلحہ کے ذخائر اور کمانڈ اینڈ کنٹرول سائٹ شامل ہیں۔