اقوام متحدہ کوطالبان کے اقتدار سنبھالنے کے بعد خواتین سے متعلق خدشات لاحق

نیویارک: اقوام متحدہ کو افغانستان میں طالبان کی جانب اقتدار سنبھالنے کے بعد خواتین اور نوجوان لڑکیوں کے حقوق سے متعلق خدشات لاحق ہوگئے،آج سلامتی کونسل کا اجلاس طلب کرلیا گیا۔

اقوام متحدہ کے سیکریٹری جنرل انتونیو گوتریس نے اپنے ایک بیان میں طالبان اور دیگر تمام فریقوں پر زور دیا ہے کہ وہ انسانی جانوں کے تحفظ اور انسانی ضروریات کو پورا کرنے کے لیے انتہائی تحمل کا مظاہرہ کریں۔

مزید پڑھیں:افغانستان پر طالبان کا قبضہ امریکا کی شکست ہے، جوبائیڈن استعفیٰ دیں، ڈونلڈ ٹرمپ

اقوام متحدہ نے طالبان پر زور دیا کہ وہ خواتین اور لڑکیوں کے حقوق کے تحفظ کو یقینی بنائیں ، سیکریٹری جنرل انتونیو گوتریس کا کہنا ہے کہ وہ خاص طور پر خواتین اور لڑکیوں کے مستقبل کے بارے میں فکر مند ہیں۔

اقوام متحدہ کی سلامتی کونسل کا افغانستان کے حوالے سے اجلاس آج  ہوگا۔سیکریٹری جنرل انتونیو گوتریس اس اجلاس میں افغانستان کی صورتحال کے بارے میں رپورٹ پیش کریں گے ۔

واضح رہے کہ طالبان کی جانب سے کابل پر قبضے کے بعد اب افغان میڈیا کی جانب سے خبریں آرہی ہیں کہ افغان صدر اشرف غنی نے افغانستان چھوڑ دیا ہے جبکہ برطانوی میڈیا کا اس حوالے سے کہنا ہے کہ افغان صدر اشرف تاجکستان چلے گئے ہیں جبکہ دوسری جانب کابل ایئر پورٹ پر پھنسا ہوا دوسرا پاکستانی طیارہ بھی پاکستان کے لئے روانہ ہوچکا ہے۔