امریکا نے سابق وزیراعظم عمران خان کے لگائے گئے تمام الزامات مسترد کردیئے

نیویارک: امریکی محکمہ خارجہ کے ترجمان نیڈ پرائس کا کہنا ہے کہ سابق وزیراعظم پاکستان عمران خان کے الزامات بے بنیاد ہیں، پاکستان کے ساتھ تعلقات کی قدر کرتے ہیں۔

تفصیلات کے مطابق پریس بریفنگ میں نیڈ پرائس نے کہا کہ پروپیگنڈے اورجھوٹ کو تعلقات کی راہ میں رکاوٹ نہیں بننے دیں گے، وزیر خارجہ ٹونی بلنکن کی نئے پاکستانی ہم منصب سے 6 مئی کو گفتگو ہوئی، دونوں رہنماؤں نے تعاون کو مزید مضبوط بنانے پر بات کی۔

یہ بھی پڑھیں: ایلون مسک نے ٹرمپ کا ٹوئٹر اکاؤنٹ بحال کرنے کا اعلان کردیا

نیڈ پرائس کا کہنا ہے کہ امریکی وزیر خارجہ نے بلاول بھٹو زرداری کے ساتھ ملاقات میں دوطرفہ تعلقات کے فروغ پر زور دیا، دونوں رہنماوں نے باہمی اقتصادی تعلقات، تجارت، سرمایہ کاری سے متعلق تعاون پر بھی زور دیا، وزیر خارجہ ٹونی بلنکن اور بلاول میں توانائی، صحت اور تعلیم سے متعلق امورپر بھی تبادلہ خیال ہوا۔

انہوں نے کہا کہ پاکستان اور امریکہ کے وسیع البنیاد اور دوطرفہ تعلقات ہیں۔ اُن کا کہنا تھا کہ اس موقع پر افغانستان، دہشتگردی، تجارت، ماحولیات، توانائی، صحت اور تعلیم سمیت کئی شعبوں میں تعاون پر تبادلہ خیال ہوا۔