جو قوم اپنے مستقبل اور نسلوں کے بارے میں فکر مند نہ ہو، برباد ہوجاتی ہے۔ وزیر اعظم

وزیر اعظم  پاکستان عمران خان نے کہا ہے کہ ماحولیاتی آلودگی کے خلاف کام ضروری ہے جبکہ اگر کوئی قوم اپنے مستقبل اور نسلوں کے بارے میں فکر مند نہ ہو وہ  برباد ہوجاتی ہے۔ 

وفاقی دارالحکومت اسلام آباد میں وزیر اعظم عمران خان نے ”کلین اینڈ گرین پاکستان انڈیکس“ کا افتتاح کرنے کے بعد تقریب سے خطاب کرتے ہوئے کہا کہ آج ہم لاہور کی فضا میں سانس نہیں لے سکتے کیونکہ یہاں آلودگی اپنی انتہا کو پہنچ چکی ہے اور بچوں کی زندگیوں کو خطرات لاحق ہیں۔

یہ بھی پڑھیں: توہینِ عدالت کیس: غلام سرور اور فردوس عاشق اعوان کی معافی قبول

تقریب سے خطاب کرتے ہوئے وزیر اعظم عمران خان نے کہا کہ تاریخ کا سب سے بہتر بلدیاتی نظام لانا چاہتے ہیں جسے اگر ترقی کرنی ہے تو سندھ حکومت بھی اختیار کرسکتی ہے جبکہ نئے پاکستان کے تصور کو سمجھنے کی ضرورت ہے۔ 

وزیر اعظم عمران خان نے کہا کہ آلودگی خاموش قاتل بن چکی ہے  جبکہ گزشتہ 10 سال کے اندر اندر لاہور سے 70 فیصد جنگلات کا صفایا کردیا گیا۔ ہمیں مل کر ان سب مسائل کا مقابلہ کرنا ہے۔

نئے پاکستان کے تصور پر روشنی ڈالتے ہوئے وزیر اعظم نے کہا کہ نیا پاکستان ذہن میں پہلے اور زمین پر بعد میں آئے گا کیونکہ تبدیلی پہلے ذہن میں پیدا ہوتی ہے۔ عوام ٹیکس دے رہے ہیں جس سے ہمارے پاس پیسہ آ رہا ہے۔ نبی کریم ﷺ کا فرمان ہے کہ صفائی نصف ایمان ہے۔ خدا کسی ایسی قوم کی حالت نہیں بدلتا جو خود اس کی کوشش نہ کریں۔ 

انہوں نے کہا کہ ہم نے خیبر پختونخواہ میں 5 سال کے عرصے میں 1 ارب درخت لگائے۔ شہروں میں علاقوں کو سرسبز بنانے سے ماحولیاتی آلودگی دور ہوتی ہے۔ جو کام اپنی ذات کے لیے کیا جائے، اس میں برکت نہیں ہوتی۔ 

یاد رہے کہ اس سے قبل  وزیراعظم پاکستان عمران خان نے  ملک بھر میں ”کلین گرین انڈیکس“ کے تحت شہروں میں پانی اور صفائی کے نظام پر معلوماتی پروگرام کا آغاز کیا  جبکہ ابتدائی طور پر 19 شہروں کی رینکنگ کی جائے گی۔

مزید پڑھیں: کلین گرین انڈیکس کے تحت شہروں کی رینکنگ کی جائے گی