عمران صاحب آپ نے اپنی نااہلی اور نالائقی سے ہنستے بستے ملک کو انتشار کا شکار کردیا، مریم اورنگزیب

لاہور: پاکستان مسلم لیگ (ن) کی ترجمان مریم اورنگزیب نے کہا ہے کہ پی آئی سی میں جو ہوا قابل مذمت ہوا مگر جو تباہی اور نحوست عمران صاحب کی حکومت میں آئی وہ پاکستان میں نہ کبھی دیکھی اور نہ سنی تھی۔

مریم اورنگزیب نے وزیراعظم عمران خان کے بیان پر ردعمل کا اظہار کرتے ہوئے کہاکہ عمران صاحب پی آئی سی کے واقعے سے ثابت ہو گیا کہ ملک میں حکومتی ایڈمنسریشن اور گورننس کا مکمل بریک ڈاؤن ہے ،بتایا جائے کہ ابھی تک کیا تحقیق اور کارروائی ہوئی ہے ۔

عمران صاحب پی آئی سی کا واقعہ کی وجہ وہ منفی رویے ہیں جو آپ نے عوام کو تحفے میں دئیے ہیں ،آپ اور آپ کی نااہل اور نالائق حکومت کو بے شرمی کا ایوارڈ ملنا چاہئیے ۔

مزید پڑھیں:صوبائی وزیر فیاض الحسن چوہان جیسے لوگ ہمارا اثاثہ ہیں۔وزیر اعظم عمران خان

پی آئی سی واقعہ کو اپنی حکمت عملی قرار دینا آپ کے ذہنی دیوالیہ پن کاثبوت ہے ،اپنی مجرمانہ نالائقی اور نااہلی کو حکمت عملی قرار دینے پہ آپ کو شرم آنی چاہیے،عمران صاحب وزیراعلی کا میدان سے بھاگ جانا آپ کی حکمت عملی تھی؟،اسپتال میدانِ جنگ بن گیا ، مریض موت کے منہ میں چلے گئے، یہ تھی آپ کی حکمت عملی ؟۔

عمران صاحب آپ کی حکمت عملی پارلیمان، پی ٹی وی اور سرکاری عمارات پر حملہ کرنا ہے،آپ کی حکمت عملی منتخب وزیراعظم کو گلے سے پکڑ کر گھسیٹ دو ہے،آپ کی حکمت عملی جلاؤ، گھیراو، مارو، ماردو ہے،آپ نے کنٹینر پر کھڑے ہوکر جو سبق پڑھایا تھا، یہ اس کے اثرات ہیں۔عمران صاحب آپ نے اپنی نااہلی اور نالائقی سے ہنستے بستے ملک کو انتشار کا شکار کردیا ہے۔