گوگل نیوز پر ہمیں فالو کریںکراچی اور لاہور کا دورہ کرنے والے سری لنکن کرکٹ بورڈ کے سیکورٹی وفد نے اپنے دورے کے حوالے سے بورڈ کوانتہائی مثبت رپورٹ دی ہے جس سے رواں سال پاکستان میں ٹیسٹ کرکٹ کی واپسی کے امکانات روشن ہو گئے ہیں۔
پاکستان کرکٹ بورڈ نے اعلان کیا ہے کہ ملک میں دس سال کے طویل وقفے کے بعد ٹیسٹ کرکٹ بحال ہو جائے گی ، سری لنکا کی ٹیم دسمبر میں ورلڈ ٹیسٹ چمپئن شپ کے میچز راولپنڈی اور کراچی میں کھیلے گی۔
اگر سری لنکن ٹیم پاکستان میں ٹیسٹ میچ کھیلتی ہے تو یہ ایک طریقے سے مشکل وقت میں پاکستان کے جذبہ خیرسگالی کا مثبت جواب ہو سکتا ہے۔
مارچ 2009 میں سری لنکن ٹیم پر لاہور میں دہشت گردوں کی جانب سے کیے گئے حملے کے بعد سے پاکستان پر انٹرنیشنل کرکٹ کے دروازے بند ہو گئے تھے اور اس کے بعد سے قومی کرکٹ ٹیم نے کوئی بھی ٹیسٹ میچ اپنی سرزمین پر نہیں کھیلا تاہم سری لنکن سیکورٹی وفد کی مثبت رپورٹ کے بعد اب پاکستان 10سال کے طویل وقفے کے بعد پہلی مرتبہ ٹیسٹ میچ کی میزبانی کر سکتا ہے۔
پاکستان میں 2015 میں زمبابوئےکی ٹیم نے دورہ کرکے پاکستان میں کرکٹ کی بحالی میں اہم کردار اداکیا جبکہ حال ہی میں سری لنکن کرکٹ ٹیم نے پاکستان میں ایک روزہ اور ٹی ٹوئنٹی میچوں کی سیریز کھیلی تھی۔
واضح رہے کہ سری لنکا بھی پاکستان کی طرح دہشت گردی کا شکار رہاہے ، پاکستان میں کرکٹ کی بحالی میں سری لنکا کاکردار ناقابل فراموش ہے، ستمبراکتوبر میں پاکستا ن میں ایک روزہ اور ٹی ٹوئنٹی میچوں کی سیریز کے بعد دسمبر میں ٹیسٹ میچ کیلئے سری لنکن ٹیم پاکستان آئے گی۔
پاکستان اورسری لنکا کے درمیان پہلا ٹیسٹ میچ 11 سے 15 دسمبر تک پنڈی اسٹیڈیم راولپنڈی میں کھیلا جائے گا،جبکہ دوسرا میچ 19 سے 23 دسمبر تک نیشنل اسٹیڈیم کراچی میں شیڈول ہے۔
مزید پڑھیں : قائم اعظم ٹرافی میں بال ٹمپرنگ،ٹیسٹ کرکٹر احمدشہزادپرجرمانہ عائد
