سندھ حکومت کا کراچی میں انٹرا سٹی بس منصوبہ جلد شروع کرنے کا اعلان

کراچی:وزیر ٹرانسپورٹ سندھ اویس قادر شاہ نے کراچی میں انٹرا سٹی بس منصوبہ جلد شروع کرنے کا اعلان کیا ہے، محکمہ ٹرانسپورٹ پہلے مرحلے میں کراچی کے 7روٹس پر بسیں چلائے گا۔

منگل کوجاری بیان میں اویس قادر شاہ نے کہاکہ ترکی کی کمپنی کراچی میں پبلک ٹرانسپورٹ منصوبے پر کام کرے گی، محکمہ ٹرانسپورٹ کو انٹرا سٹی بس منصوبے کے لئے فنڈز مل گئے ہیں۔

وزیر ٹرانسپورٹ سندھ نے کہا کہ 250ڈیزل ہائبرڈ بسوں کی خریداری کے لئے تمام مراحل مکمل کرلئے گئے ہیں جو آئندہ 4 ماہ میں پہنچ جائیں گی۔

انہوں نے کہاکہ چار بس ڈپو بس آپریشنز چلانے کے لئے دیئے جائیں گے، دیگر ٹرانسپورٹ منصوبوں پر بھی پیشرفت ہورہی ہے، ایدھی، اورنج لائن اور ریڈ لائن منصوبے پر بھی کام تیزی سے جاری ہے۔

مزید پڑھیں:
گرین لائن منصوبہ مکمل کرنے میں سندھ حکومت نے کوئی تعاون نہیں کیا، خرم شیر زمان

کراچی آنیوالی عالمی معیار کی گرین لائن بسیں راولپنڈی، پشاور اور لاہورکی بسوں سے جدید

دوسری جانب ترجمان وزیر ٹرانسپورٹ کے مطابق ترکی کی پبلک ٹرانسپورٹ کمپنی کے نمائندے کراچی پہنچ گئے ہیں، ترک کمپنی کے نمائندوں نے یو پی موڑ بس ڈپو کا دورہ کیا اور روٹس کا بھی معائنہ بھی کیا۔

اس سے قبل وزیر ٹرانسپورٹ سندھ اویس قادر شاہ نے کہاتھاکہ وفاقی حکومت نے سندھ میں کیا کیا ہے؟ جو وعدے کئے وہ بھی پورے نہیں کئے، سی پیک سے کراچی سرکلر ریلوے کو نکلوا کرایم ایل ون میں شامل کر دیاہے۔

ان کا کہنا تھا کہ وفاقی حکومت غیرسنجیدہ ہے، گرین لائن کا حال بھی پشاور میٹرو جیسا نہ ہوجائے۔اویس قادر شاہ نے اپنے ایک بیان میں کہا کہ گرین لائن پراجیکٹ نواز شریف نے 2016میں شروع کیا، اس پراجیکٹ کا بہت سارا انفرا اسٹرکچر ابھی مکمل نہیں ہوا۔