کرتارپور میں پرتپاک استقبال پر سکھ یاتری پاکستان کے مشکور

ننکانہ صاحب: بابا گرو نانک کے 552 ویں یوم پیدائش کی تقریبات میں شرکت کرنے والے سکھ یاتریوں نے کرتارپور کوریڈور کے ذریعے گوردوارہ دربار صاحب تک رسائی آسان بنانے اورپرتپاک استقبال پرحکومت پاکستان کی تعریف اورشکریہ ادا کیا ہے۔

سکھ مذہب کے بانی کے یوم پیدائش کی دس روزہ تقریبات کے لیے دنیا بھر سے سکھ یاتریوں کی پاکستان آمد کا سلسلہ جاری ہے۔

پاکستان میں مہمانوں کے محفوظ اور خوشگوار قیام کو یقینی بنانے کے لیے حکومتی اہلکار یاتریوں کا استقبال کر رہے ہیں اور انتظامات کی نگرانی کر رہے ہیں۔

مزید پڑھیں:کرتار پور راہداری کھولنے کی اجازت

وزیراعظم کی جانب سے وفاقی وزیر برائے مذہبی امور و بین المذاہب ہم آہنگی پیر نور الحق قادری سکھ یاتریوں کے استقبال کے لیے ننکانہ صاحب پہنچے اورحکومت کی جانب سے یاتریوں کو زیادہ سے زیادہ سہولیات فراہم کرنے کے عزم کا اعادہ کیا۔

اس موقع پر انہوں نے کہا کہ حکومت ننکانہ صاحب میں بابا گرو نانک یونیورسٹی قائم کرنے جا رہی ہے جو مسلمانوں اور سکھوں کو ایک دوسرے کے قریب لائے گی، پاکستان پوری سکھ برادری کیلئے عزت کی جگہ ہے۔

انہوں نے کہا کہ پاکستان میں سکھ یاتریوں کو تمام سہولیات فراہم کی جا رہی ہیں اور حکومت ملک میں بین المذاہب ہم آہنگی کی فضا کو برقرار رکھنے کے لیے مخلصانہ کوششیں کر رہی ہے۔