شہباز شریف نے قوم کو گمراہ کرنے کیلئے بیان دیا، آشیانہ ہاؤسنگ سکیم سے متعلق معاملہ زیرسماعت ہے، فردوس عاشق

اسلام آباد: معاون خصوصی برائے اطلاعات ونشریات فردوس عاشق اعوان نے کہاہے کہ شہباز شریف نے قوم کو گمراہ کرنے کیلئے بیان دیا، آشیانہ ہاؤسنگ سکیم سے متعلق معاملہ زیرسماعت ہے ، ملکی فضائیں اپوزیشن لیڈر کی متلاشی ہیں۔

میڈیا سے گفتگو کرتے ہوئے فردوس عاشق اعوان نے کہاکہ ملکی فضائیں اپوزیشن لیڈر کی متلاشی ہیں۔ انہوں نے کہاکہ اپوزیشن لیڈر نے جھوٹ کے ذریعے من گھڑت بیانیہ پیش کیا ۔معاون خصوصی نے کہاکہ شہباز شریف نے قوم کو گمراہ کرنے کیلئے بیان دیا۔

انہوں نے کہاکہ آشیانہ ہاؤسنگ سکیم سے متعلق معاملہ زیرسماعت ہے جس کیس کا فیصلہ نہیں ہوا اس پر وکٹری نشان بنائے جا رہے ہیں۔معاون خصوصی نے کہاکہ عدالت نے آپ کو کلیئرنس سرٹیفکیٹ نہیں دیا۔

معاون خصوصی اطلاعات نے کہاکہ شہباز شریف نے نیب کی غیر جانبدارانہ حیثیت کو متنازعہ بنانے کی کوشش کی ،شریف برادران اپنی اصل پہچان کے حوالے سے قوم کو آگاہ کریں ۔معاون خصوصی نے کہاکہ لگ رہا ہے شریف برادران کے اصل تعارف کی ذمہ داری مجھے لینا پڑے گی۔

انہوں نے کہاکہ نیب قانون کی حکمرانی کو یقینی بنانے کی کوشش رہا ہے ،انہوں نے کہاکہ وزیراعظم عمران خان کا قانون کی حکمرانی کا خواب شرمندہ تعبیر ہورہا ہے ۔انہوںنے کہاکہ آپ کے دور میں ملکی دولت ٹی ٹیز کے ذریعے بیرون ملک گئی۔

مزید پڑھیں: نواز شریف اور ان کی ٹیم کی بے گناہی ایک ایک کر کے سامنے آرہی ہے،شہباز شریف

معاون خصوصی نے کہاکہ کاش کہ شہبازشریف قوم کی لوٹی دولت سے متعلق بھی کوئی بیان دیتے،شہباز شریف نے نواز شریف کی صحت سے متعلق آگاہ نہیں کیا۔معاون خصوصی نے کہاکہ شہبازشریف جس مقصد کیلئے لندن گئے اس پر کوئی بیان نہیں دیا۔

معاون خصوصی نے کہاکہ اپوزیشن نے خود چیف الیکشن کمشنر اور ارکان کی تعیناتی کیلئے وقت لیا،دوسری طرف رہبر کمیٹی ارکان نے سپریم کورٹ سے رجوع کر لیا۔معاون خصوصی نے کہاکہ پارلیمان کو بالادست اور جمہور کے ترانے گانے والے خودپارلیمنٹ کو کمزور کر رہے ہیں ۔

انہوں نے کہاکہ قوم کی لوٹی گئی دولت واپس لانے کے وزیراعظم کے وعدے کا آغاز ہوچکا۔ انہوں نے کہاکہ پاکستان کا قانون لٹیروں کا پیچھا کرتا رہے گا۔معاون خصوصی اطلاعات نے کہاکہ پاکستانی خاندان سے گزشتہ روز 38ارب سے زائد کی رقم کی واپسی کی خبر آئی،کسی حکمران نے جرات نہیں کی کہ وہ لوٹی دولت کو واپس لائے ۔

معاون خصوصی نے کہاکہ وزیراعظم عمران خان نے ناممکن کو ممکن کردکھایا۔معاون خصوصی نے کہاکہ لوٹی دولت کی واپسی کے حوالے سے عوام کو خوشخبریاں ملتی رہیں گی۔ انہوں نے کہاکہ لندن میں پریس کانفرنس کرنے کی بجائے ملک آ کر مقدمات کا سامنا کریں ۔

انہوں نے کہاکہ نیب خود مختار ادارہ ہے ، نیب پر کوئی دبا ؤ نہیں۔ڈاکٹر فردوس عاشق اعوان نے کہاکہ عمران خان کی کسی سے ذاتی عناد نہیں ، ملکی مفاد کیلئے کام کررہے ہیں ،حتمی فیصلہ آنے تک شہباز شریف ملزم ہی رہیں گے۔معاون خصوصی اطلاعات نے کہاکہ سیاست اور ریاست کو الگ رکھ کے دیکھنا چاہیے۔