ایس بی سی اے کی مددکے بغیر غیر قانونی تعمیر ناممکن ہے، سندھ ہائیکورٹ

کراچی:سندھ ہائی کورٹ نے ایس بی سی اے کی مدد کے بغیر شہر میں غیر قانونی تعمیرات ناممکن قرار دیتے ہوئے جمشید ٹاؤن میں بغیر منظوری کے پورشن کی تعمیرات سے متعلق درخواست پر ڈائریکٹر ایس بی سی اے جمشید ٹاؤن سے عمل درآمد رپورٹ طلب کرلی ہے۔

بدھ کو سندھ ہائی کورٹ میں جسٹس سید حسن اظہر رضوی کی سربراہی میں بینچ نے جمشید ٹاؤن میں بغیر منظوری کے پورشن کی تعمیرات سے متعلق درخواست پرسماعت کی۔2019 کے حکم نامے پر عمل نہ کرنے پر عدالت سخت برہم ہوگئی۔

یہ بھی پڑھیں:

جسٹس عمر عطا بندیال کی بطور چیف جسٹس تعیناتی، سمری تیار کر لی گئی

جسٹس سید حسن اظہر رضوی نے ریمارکس دیئے کہ یہ سب کچھ ایس بی سی اے کی ملی بھگت سے ہو رہا ہے۔ آپ بلڈرز کو مدد فراہم کر رہے ہیں ۔ بتائیں، بلڈر کے خلاف ایف آئی آر درج کی؟ نسلہ ٹاور میں بلڈر اور ایس بی سی اے افسران کے خلاف ایف آئی آر ہوئی۔

عدالت نے ایس بی سی اے وکیل سے مکالمہ میں کہا کہ آپ کا پورا اسٹاف ملا ہوا ہے۔ عدالت نے ریمارکس دیئے کہ آپ کی مدد نہ ہو تو شہر میں غیر قانونی تعمیرات ہو ہی نہیں سکتیں۔2019میں فیصلہ ہوا اب تک عمل کیوں نہیں کیا؟ عدالت نے برہمی کا اظہار کرتے ہوئے کہا کہ 2019کا فیصلہ ہے، اب تک عمل نہیں کیا۔

عدالت نے ڈائریکٹر ایس بی سی اے جمشید ٹاؤن سے عمل درآمد رپورٹ طلب کرلی۔ جمشید ٹاؤن میں پورشن کے خلاف منصورہ ظہیر نے درخواست دائر کر رکھی ہے۔