گوگل نیوز پر ہمیں فالو کریںلاہور قلندرز کے کپتان اور پاکستان کے اسٹار فاسٹ باؤلر شاہین شاہ آفریدی نے تمام قیاس آرائیوں کو مسترد کرتے ہوئے واضح الفاظ میں کہا ہے کہ وہ کسی بھی فارمیٹ سے دستبردار نہیں ہو رہے اور جب تک جسمانی طور پر فٹ ہیں، تمام فارمیٹس میں کھیل جاری رکھیں گے۔
نجی نیوز چینل سے گفتگو کرتے ہوئے شاہین نے کہا کہ میں کسی فارمیٹ سے الگ نہیں ہو رہا۔ جب تک سانس چل رہی ہے، میں تمام فارمیٹس میں پاکستان کے لیے کھیلتا رہوں گا۔
شاہین نے پی ایس ایل 10 میں لاہور قلندرز کی مہم پر بات کرتے ہوئے اعتراف کیا کہ کامیابی آسان نہیں تھی۔ ان کا کہنا تھا کہ اس سفر میں کئی اتار چڑھاؤ آئے، لیکن کریڈٹ جاتا ہے عاطف رانا اور سمین رانا کو جنہوں نے نوجوان کھلاڑیوں پر اعتماد کیا۔ ہمارے پلیئر ڈیولپمنٹ پروگرام (PDP) نے جن کھلاڑیوں کو موقع دیا، انہوں نے اس سے بھرپور فائدہ اٹھایا۔
شاہین نے کہا کہ کھلاڑیوں نے ایک دوسرے پر بھروسہ کیا۔ یہ صرف کسی ایک کھلاڑی کی بات نہیں چاہے شاہین ہو یا نہ ہو اصل چیز ٹیم کا ماحول ہوتا ہے۔ کسی نے کسی پر انگلی نہیں اٹھائی، سب نے ایک دوسرے کو سپورٹ کیا، اور یہی جیت کی بنیاد بنتا ہے۔
انہوں نے سکندر رضا کی ڈرامائی واپسی کو یاد کرتے ہوئے کہاکہ اس کی انٹری فلمی سین جیسی تھی۔ میں نے ایسا کرکٹر پہلے کبھی نہیں دیکھا سفر کی تھکن کے باوجود آ کر باؤلنگ کی، وکٹ لی اور ٹیم کو فتح دلانے میں اہم کردار ادا کیا۔
