سینیٹر ایوب آفریدی کے استعفے نے شوکت ترین کے انتخاب کی راہ ہموار کردی

اسلام آباد: مشیر خزانہ شوکت ترین کے انتخاب کے لیے پاکستان تحریک انصاف (پی ٹی آئی) کے سینیٹر ایوب آفریدی نے پارلیمنٹ کے ایوان بالا کی اپنی نشست سے استعفیٰ دے دیا ہے۔

حکومت نے وزیر اعظم کے مشیر برائے خزانہ اور محصولات شوکت ترین کو خیبر پختونخوا سے بطور سینیٹر منتخب کرنے کا فیصلہ کیا ہے تاکہ انہیں دوبارہ وزیر خزانہ کا منصب تفویض کیا جاسکے۔ توقع کی جاری ہے کہ ایوب آفریدی کو وزیراعظم کے مشیر برائے سرحدی علاقہ جات مقرر کیا جائے گا۔

وفاقی حکومت نے رواں ماہ وزیر خزانہ کی حیثیت سے چھ ماہ کی آئینی مدت ختم ہونے کے بعد شوکت ترین کو مشیر خزانہ مقرر کیا تھا۔ نوٹیفکیشن کے مطابق شوکت ترین کا عہدہ وفاقی وزیر کے عہدے کے برابر ہو گا۔

یہ بھی پڑھیں 

اوور سیز پاکستانیوں کے لیے وزیراعظم کا پیغام لے کر آیا ہوں، رضا باقر

آئین کی رو سے شوکت ترین وزیر خزانہ کے منصب پر اسی صورت میں فائز رہ سکتے تھے اگر وہ چھ کے ماہ اندر اندر پارلیمنٹ کے رکن منتخب ہو جاتے تاہم ان کی مدت جمعہ کے روز ختم ہو گئی تھی۔

شوکت ترین کو وفاقی حکومت نے اس سال 17 اپریل کو وزیر خزانہ مقرر کیا گیا تھا۔ حکومت پر امید ہے کہ شوکت ترین خیبر پختونخوا سے آسانی سے نشست حاصل کرلیں گے کیوں کہ پی ٹی آئی کو صوبے میں اکثریت حاصل ہے۔

آئین کی رو سے شوکت ترین اقتصادی رابطہ کمیٹی (ای سی سی) اور کابینہ کی دیگر کمیٹیوں کی صدارت نہیں کر سکتے ہیں۔ توقع کی جارہی ہے کہ حکومت انہیں سینیٹر منتخب کرا کر دوبارہ وزیر خزانہ کا منصب دے گی۔

واضح رہے کہ مشیر خزانہ شوکت ترین اس وقت واشنگٹن میں ہیں جہاں وہ بین الاقوامی مالیاتی فنڈ (آئی ایم ایف) کے ساتھ 6 ارب ڈالر کی توسیعی فنڈ سہولت (ای ایف ایف) کے چھٹے جائزے پر بات چیت کر رہے ہیں۔