دیامیر بھاشا اور مہمند ڈیم فنڈز، بیرون ملک سفارتخانوں میں ڈیم فنڈ کی بڑی رقم پھنس گئی، سپریم کورٹ

اسلام آباد: سپریم کورٹ نے دیامیر بھاشا اور مہمند ڈیم فنڈز کیس میں کہا ہے کہ معلوم ہوا ہے کہ بیرون ملک سفارتخانوں میں ڈیم فنڈ کی بہت بڑی رقم پھنس گئی ہے، رکاوٹ دور کریں اور سفارت خانوں سے رقم واپس لائیں۔

یامیر بھاشا اور مہمند ڈیم فنڈز کیس کی سماعت جسٹس گلزار احمد کی سربراہی میں قائم پانچ رکنی لارجر بینچ نے کی ۔ دور ان سماعت سپریم کورٹ میں ڈیم فنڈ کی سرمایہ کاری سے متعلق رپورٹ جمع کرادی گئی ،نیشنل بینک کی جانب سے رپورٹ وجاہت قریشی نے جمع کرائی۔

نمائندہ نیشنل بینک نے کہاکہ بارہ ارب روپے کی رقم کی سرمایہ کاری کی ہے ،جسٹس گلزار احمد نے کہاکہ آپ نے بارہ ارب روپے کی دوبارہ سرمایہ کاری کی،نمائندہ نیشنل بینک نے کہاکہ جی، جو منافع آتا ہے پھر اسے سرمایہ کاری میں شامل کردیا جاتا ہے۔

حکام نیشنل بینک نے کہاکہ نیشنل بینک کے مطابق 21 نومبر کو دوبارہ سرمایہ کاری کی گئی ۔ جسٹس گلزار احمد نے کہاکہ یہ جو دوبارہ سرمایہ کاری کی ہے اس کا منافع کب آئیگا؟۔ نمائندہ نیشنل بینک نے کہاکہ 27 فروری 2020 تک اس کا منافع آجائے گا۔

جسٹس اعجاز الاحسن نے کہاکہ ہمیں فنڈز جمع نہ ہونے سے متعلق متعدد شکایات ملی ہیں سٹیٹ بینک کو انہیں دیکھنا چاہئے۔ انہوں نے کہاکہ پتہ چلا ہے کہ نجی بینک فنڈز وصول نہیں کر رہے ، یہ سپریم کورٹ کا حکم تھا کون اس پر عمل نہیں کر رہا۔

یہ بھی پڑھیں:سپریم کورٹ کا اسلام آباد میں غیرقانونی تعمیرات اور قبضے واگزار کرانے کا حکم

جسٹس گلزار احمد نے کہاکہ کون سے بینک عدالتی حکم کی عدولی کررہے ہیں۔ جسٹس اعجاز الاحسن نے کہاکہ بیرون ملک پاکستانی ڈیم فنڈ میں رقم جمع کرانا چاہتے ہیں لیکن بینک وصول ہی نہیں کر رہے۔ جسٹس اعجاز الاحسن نے کہاکہ تمام پاکستانیوں کو ڈیم فنڈ میں رقم جمع کرانے کی سہولت ہونی چاہیے۔

جسٹس اعجاز الاحسن نے کہاکہ تمام نجی بینکوں کو حکم تھا فنڈز وصول کرنے کا پھر کون اس پر عمل درآمد نہیں کر رہا۔ جسٹس گلزار احمد نے کہاکہ معلوم ہوا ہے کہ بیرون ملک سفارتخانوں میں ڈیم فنڈ کی بہت بڑی رقم پھنس گئی ہے،رکاوٹ دور کریں اور سفارت خانوں سے رقم واپس لائیں۔

عدالت نے کہاکہ شکایات ملی ہیں کہ فنڈ جمع نہیں ہو رہا ہے لیکن ابھی تک اس پر کارروائی نہیں کی گئی،سٹیٹ بینک تمام شکایتیں اور رکاوٹوں کو دور کریں، پاکستان میں تمام بینک فنڈ کی ترسیل میں حائل رکاوٹوں کو دور کریں۔

عدالت نے کہاکہ بہت زیادہ فنڈ بیرون ملک سفارتخانوں میں ترسیلات زر کے مسائل کی وجہ سے لٹک گئے ہیں، تمام سفارت خانوں سے رابطہ کرکے فنڈز کو وصول کیا جائے۔ عدالت نے کہاکہ گورنر سٹیٹ بینک عدالتی حکم پر عمل درآمد کو یقینی بنا کر آئندہ سماعت پر رپورٹ جمع کرائیں ۔