گوگل نیوز پر ہمیں فالو کریںپنجاب پولیس نے صوبے بھر میں امن و امان کی صورتحال بہتر بنانے اور جرائم پیشہ، دہشت گرد عناصر اور شرپسندوں کے خلاف کارروائیوں کا دائرہ مزید وسیع کر دیا ہے۔ گزشتہ 24 گھنٹوں کے دوران مختلف علاقوں میں سرچ اور کومبنگ آپریشنز کے دوران 74 مشتبہ افراد کو حراست میں لیا گیا۔
پنجاب پولیس کے ترجمان کے مطابق صوبے کے مختلف اضلاع سمیت لاہور میں مجموعی طور پر 383 سرچ آپریشنز کیے گئے جن کے دوران 11 ہزار 400 سے زائد افراد کی جانچ پڑتال اور پوچھ گچھ کی گئی۔
پولیس حکام کا کہنا ہے کہ یہ کارروائیاں مسلسل جاری مہم کا حصہ ہیں جس کا مقصد صوبے میں امن و امان برقرار رکھنا، جرائم کی روک تھام اور مشکوک سرگرمیوں میں ملوث عناصر کے خلاف کارروائی کرنا ہے۔
پنجاب پولیس کے مطابق رواں سال اب تک صوبے بھر میں 84 ہزار 210 سرچ اور کومبنگ آپریشنز مکمل کیے جا چکے ہیں۔ ان کارروائیوں کے دوران 2 لاکھ 86 ہزار سے زائد افراد کی چھان بین کی گئی جبکہ 29 ہزار 445 مشتبہ افراد کو حراست میں لیا گیا۔
پولیس کے مطابق ان آپریشنز کے دوران بڑی تعداد میں غیر قانونی اسلحہ بھی برآمد کیا گیا جس میں ایک ہزار 971 پستول، 152 بندوقیں، 213 رائفلیں اور بھاری مقدار میں گولیاں و دیگر گولہ بارود شامل ہے۔
دوسری جانب انسپکٹر جنرل پنجاب پولیس ڈاکٹر عبدالکریم نے متعلقہ حکام کو ہدایت کی ہے کہ سرچ، سویپ اور انٹیلی جنس بنیادوں پر کیے جانے والے کومبنگ آپریشنز کو مزید تیز کیا جائے۔
آئی جی پنجاب نے حساس مقامات، بس اڈوں، ہوٹلز اور دیگر عوامی مقامات پر باقاعدگی سے کارروائیاں جاری رکھنے کی ضرورت پر زور دیتے ہوئے کہا کہ ایسے اقدامات قانون نافذ کرنے والے اداروں کی کارکردگی بہتر بنانے اور شہریوں کے تحفظ کے لیے انتہائی اہم ہیں۔
پنجاب پولیس نے اس عزم کا اعادہ کیا ہے کہ صوبے میں امن و سلامتی کے قیام کے لیے فعال اور مسلسل کارروائیاں جاری رکھی جائیں گی تاکہ جرائم اور غیر قانونی سرگرمیوں کا مؤثر مقابلہ کیا جا سکے۔
