گوگل نیوز پر ہمیں فالو کریںکراچی میں پاکستان تحریکِ انصاف پر بیرونِ ملک سے رقوم کی غیر قانونی منتقلی کے الزام میں مقدمہ درج کر لیا گیا ہے۔ مقدمے کا اندراج ایف آئی اے اسٹیٹ بینک سرکل میں کیا گیا۔
تفصیلات کے مطابق پی ٹی آئی کے خلاف اسٹیٹ بینک سرکل ایف آئی اے میں گزشتہ روز مقدمہ درج کیا گیا۔ ایف آئی آر نمبر 14/2022 میں سید عارف مسعود نقوی، پی ٹی آئی عہدیدار طارق شفیع اور رفیع لاکھانی نامزد ملزمان ہیں۔
مریم نواز قطر میں مختلف شخصیات سے ملاقاتیں کرینگی
پی ٹی آئی کے خلاف مقدمہ انسپکٹر محمد سرور اصغر کی مدعیت میں درج ہوا جس میں دھوکہ دہی کی دفعہ 420 کے علاوہ 417، 109، 4، 5، 13 اور 23 بھی شامل کی گئی ہیں۔ حکام کا کہنا ہے کہ تفتیش کے دوران ابراج گروپ کے عارف نقوی کے علاوہ دیگر نام سامنے آئے۔
تحقیقات میں سامنے آنے والے ناموں میں عارف مسعود نقوی کے قریبی ساتھی طارق شفیع، پی ٹی آئی کے مرکزی مالیاتی بورڈ کے رکن شامل ہیں۔ دعویٰ کیا گیا ہے کہ تحقیقات کے دوران ثابت ہوا کہ والٹن کرکٹ لمیٹڈ کے اکاؤنٹ سے 5لاکھ 57 ہزار ڈالر طارق شفیع کے کراچی اکاؤنٹ میں منتقل ہوئے۔
رقم طارق شفیع کے کراچی میں غیر ملکی بینک کی برانچ کے اکاؤنٹ نمبر 18384574501 میں 7 مئی 2013 کومنتقل ہوئی اور 8 مئی کے روز یہاں سے پی ٹی آئی اسلام آباد کے نجی بینک اکاؤنٹ نمبر 204418243 میں منتقل ہوئی۔
مقدمے کے متن کے مطابق طارق شفیع کے اسی اکاؤنٹ میں برطانوی ورجن آئی لینڈ میں رجسٹرڈ کمپنیوں سے 1.84 ملین ڈالر کی رقم بھی موصول ہوئی۔ تمام تر لین دین مختلف کمپنیوں اور افراد کی ملی بھگت سے 1947 ایکٹ کی خلاف ورزی سے ہوا۔
متن میں مدعی مقدمہ نے پی ٹی آئی پر الزام عائد کیا ہے کہ ملزمان نے فنڈز کی اصل نوعیت، مقام، نقل و حرکت اور ملکیت چھپائی۔ مدعی مقدمہ نے دفعہ 420 سمیت دیگر دفعات کے تحت ملزمان کے خلاف قانونی کارروائی کا مطالبہ کیا ہے۔
