عوام کی صحت اور ان کا تحفظ وزیر اعظم کی اولین ترجیح ہے‘ ڈاکٹر فردوس

اسلام آباد: وزیر اعظم کی معاون خصوصی برائے اطلاعات و نشریات ڈاکٹر فردوس عاشق اعوان کا کہنا ہے کہ وزیر اعظم عمران خان نے پنجاب کے چیف سکریٹری اور انسپکٹر جنرل پولیس کو ہدایت کی ہے کہ وہ ذخیرہ اندوزی اور منافع خوروں میں ملوث عناصر کی نشاندہی کریں اور ان کے خلاف سخت کارروائی کی جائے۔

ایک ٹویٹ میں، انہوں نے کہا کہ وزیر اعظم نے انتظامیہ کو ہورڈرز اور منافع خوروں کو بے نقاب کرنے کی ہدایت کی ہے، جو موجودہ صورتحال سے فائدہ اٹھانے کی کوشش کررہے ہیں۔

معاون خصوصی نے بتایا کہ وزیر اعظم نے ڈیرہ غازیخان میں ایک اجلاس کی صدارت کرتے ہوئے پنجاب میں کورونا وائرس پھیلنے سے بچاؤ کے لئے اٹھائے جانے والے اقدامات کا جائزہ لیا۔

انہوں نے کہا کہ عمران خان نے حکومت پنجاب کو ہدایت کی ہے کہ وہ عام لوگوں کو کورونا وائرس سے نمٹنے کے لئے بہترین سہولیات فراہم کرے۔

فردوس عاشق اعوان نے کہا کہ وزیر اعظم نے وہاں پر اسکریننگ کے انتظامات کے ساتھ روز مرہ کے مزدوروں کو بھی سہولیات فراہم کرنے کی ہدایت کی ہے۔