مخلص ،ایماندار قیادت کی وجہ سے پاکستان کے بارے میں بننے والا غلط تاثر زائل ہو رہا ہے، صدر مملکت

لاہور: صدر مملکت ڈاکٹر عارف علوی نے کہا ہے کہ مخلص اور ایماندار قیادت میسر آنے کی وجہ سے پاکستان کے بارے میں بننے والا غلط تاثر زائل ہو رہا ہے،پاکستان ابھرتی ہوئی مارکیٹ ہے اوربہتر سکیورٹی صورتحال کے باعث سرمایہ کاروں کیلئے محفوظ مقام بن چکا ہے۔

الحمراء میں ایڈ ایشیاء کانفرنس لاہور 2019ء سے خطاب کرتے ہوئے صدر مملکت ڈاکٹر عارف علوی نے کہا کہ آج کے دور میں مختلف قسم کے ذرائع ابلاغ کام کر رہے ہیں،میڈیا پر دی جانے والی معلومات بعض اوقات درست نہیں ہوتیں،آج کل زیادہ تر اخبارات خبروں کی بجائے آراء پر مبنی ہیں،اشتہارات میں درست معلومات اورسچائی ہونی چاہیے ۔

انہوں نے کہا کہ 70اور80کی دہائی کی ایڈورٹائزنگ کاآج کی ایڈورٹائزنگ سے تقابلی جائزہ لیں تو بہت فرق ہے ، میڈیا ایک طرح سے معاشرے کا آئینہ ہوتا ہے،آج کے دور میں ایڈورٹائزنگ رابطوں کا مجموعہ ہے،اب دنیا ممکنات کو دیکھتی ہے جو حقیقت کے قریب تر ہوتی ہیں اور یہ ایڈورٹائزنگ سے ہی ممکن ہے۔

یہ بھی پڑھیں:ڈیجیٹل پاکستان کے ذریعے عالمی سطح پر جدت کی طرف جائیں گے،،وزیراعظم

انہوں نے کہا کہ ایڈورٹائزنگ کا شعبہ دراصل مصنوعات کی اہمیت کو اجاگر کرتا ہے، اخبارات کی خبریں چوبیس گھنٹے تاخیر سے ہم تک پہنچتی ہیں جبکہ ٹی وی کی خبریں بھی بعض اوقات دوگھنٹے تک لیٹ ہوتی ہیں لیکن ڈیجیٹل میڈیا پر خبریں مسلسل چل رہی ہوتی ہیں لیکن ان پر ایڈیٹوریل کنٹرول نہیںہوتا۔

ایڈورٹائزنگ کی اہمیت اس وجہ سے بھی ہے کہ اس میں تخلیق کاری،سکلز اور آئیڈیاز ہوتے ہیں ،ایڈورٹائزنگ اس وقت ضرورت بن چکی ہے لیکن اس میں سچائی ہونی چاہیے ۔انہوں نے کہاکہ اخبارات بھی اس وقت اپنی پروڈکٹ بیچ رہے ہیں اوریہ بھی فرق کرنا مشکل ہو گیا ہے کہ نیوز اورایڈورٹائزنگ میں کیا فرق ہے،اسی طرح انٹرٹینمنٹ انڈسٹری میں بھی ایسا ہی ہو رہا ہے کیونکہ فلم میں بھی ایڈورٹائزنگ پربہت زیادہ فوکس ہوتا ہے۔

صدر مملکت ڈاکٹر عارف علوی نے غیر ملکی وفود کا پاکستان آمد پر خیر مقدم کرتے ہوئے اس امید کا اظہار کیا کہ وہ لاہور کی ثقافت سے لطف اندوز ہوں گے،برطانوی شہزادہ ولیم اور شہزادی کیٹ اورہالینڈ کی ملکہ میکسیما نے اپنے حالیہ دورہ لاہور پر اپنے تاثرات میں اسے خوبصورت اور تاریخی شہر قرار دیا۔

امید ہے کہ غیر ملکی وفود جب اپنے اپنے ملک واپس جائیں گے تو یہ پاکستان کے سفیر بن کر جائیں گے۔چیئرمین آرگنائزنگ کمیٹی ایڈ ایشیاء سرمد علی نے کہا کہ 1989ء میں لاہور میں ایڈ ایشیاء کانفرنس منعقد ہوئی جس کے 30 سال بعد دوبارہ لاہور میں اس کانفرنس کا انعقاد کیا گیا۔انہوں نے امید ظاہر کی کہ کانفرنس کے پاکستان میں انعقاد سے ایڈورٹائزنگ کے شعبہ کو تقویت ملے گی۔