پولیس اہلکار نے جان خطرے میں ڈال کر تین بچیوں کو بچالیا

ایڈیشنل آئی جی کراچی نے کورنگی ندی میں طغیانی کے باعث پانی میں پھنسی تین بچیوں کی جان بچانے پر پولیس اہلکار سکندر کو 25 ہزار روپے کیش اور تعریفی سند بطور انعام دینے کا اعلان کردیا۔

تھانہ بلوچ کالونی میں تعینات پولیس اہلکار سکندر نے اپنی جان کی پروا نہ کرتے ہوئے سیلابی ریلے میں پھنسی بچیوں کو پانی سے نکال کر محفوظ مقام پر پہنچایا۔

اس سلسلے میں کراچی پولیس کا کہنا ہے کہ کراچی پولیس پانی میں پھنسے شہریوں کو بحفاظت نکال کر انہیں ان کی منزلوں کی جانب گامزن ہونے میں بھرپور مدد فرہم کر رہی ہے۔

کراچی پولیس نے شہریوں سے اپیل کی ہے کہ کسی بھی ایمرجنسی کی صورت میں مددگار 15 کو اطلاع دیں تاکہ پولیس بروقت امداد فراہم کر سکے۔

کراچی میں شہریوں کی مدد کیلئے ضلعی پولیس اور ٹریفک پولیس ہر ممکن وسائل کو بروئے کار لاتے ہوئے اپنے فرائض کی انجام دہی میں مصروف عمل ہے۔